قسه‌ی ئه‌وانه‌ به‌ ته‌واوی راست ده‌رچوو، ئه‌وانه‌ی له‌ساڵی (2003) و له‌ سه‌روبه‌ندی جه‌نگی رووخانی رژێمی پێشوودا ده‌یانگوت: دیموكراسی له‌سه‌ر پشتی ده‌بابه‌ ناچێته‌ هیچ ولاَتێك، ئه‌وكات.. ئێمه‌ پێمان وابوو ئه‌وان كه‌سانی شۆڤینی و قین له‌ دڵن بۆیه‌ وا ده‌ڵێن، ره‌نگه‌ واش بووبێ، ره‌نگه‌ ئه‌وان به‌هۆی شۆڤینیبوونیان وایان گوتبێ، به‌لاَم به‌ته‌واوی وابوو، له‌دوای ئه‌وساڵه‌وه‌ تا ئێستا كه‌ نزیكه‌ی پێنج ساڵ ده‌كات، عێراق خێری له‌خۆ نه‌دیووه‌، شه‌ڕوشۆڕه‌كان نه‌بڕانه‌وه‌ و خزمه‌تگوزارییه‌كانیش هه‌ر نه‌گه‌یشتن. هه‌موو گروپ و لایه‌نه‌ سیاسی و كاربه‌ده‌سته‌كانی عێراق خه‌ریكی بیانووگرتن له‌یه‌ك و شه‌ڕبه‌یه‌ك فرۆشتن و به‌ده‌ستهێنانی ده‌سكه‌وتی زیاتر و پاره‌ی زیاترن بۆخۆیان. كه‌س به‌چاوی به‌زه‌ییه‌وه‌ ناڕوانێته‌ میلله‌ت. كاره‌باكه‌ هه‌ر نه‌هات، بایه‌عییه‌كه‌ به‌ناڕێكی و به‌ پچڕپچڕی هه‌یه‌، ئه‌وه‌نده‌ی هه‌شه‌ له‌به‌ر خاتری چاوی میلله‌ت نییه‌، به‌ڵكو له‌به‌رئه‌وه‌یه‌ خێرێكی باشی بۆ ئه‌و كه‌سانه‌ تێدایه‌ كه‌ خه‌ریكی هێنان و سه‌ودا و مامه‌ڵه‌ی ئازووقه‌كه‌ن، ئه‌گه‌ر ئه‌و خێره‌ نه‌با، ئه‌وانیش نه‌یانده‌هێنا.
دوای رووخانی رژێمی پێشوو راسته‌وخۆ "رزگاركه‌ره‌ خۆماڵییه‌كان!! " ده‌ستیانكرده‌ دزی و به‌تالاَنبردنی ماڵی خه‌ڵكی هه‌ژار، تا گه‌یشته‌ ئه‌و راده‌یه‌ی لێژنه‌ی نه‌زاهه‌ پێكهێنرا و كه‌وتنه‌ دوای ئه‌وانه‌ی كه‌ له‌ حكومه‌ته‌ كاتییه‌كان ده‌ستیان به‌دزیكردن كردووه‌، بۆ ئه‌وه‌ی ده‌سگیریان بكه‌ن.
ئه‌وشته‌ سه‌یرانه‌ی له‌م چه‌ند ساڵه‌ روویانداوه‌، سه‌دام و داروده‌سته‌كه‌ی رێگه‌یان پێ نه‌ده‌برد. كه‌سانێك كه‌ دوێنێ له‌ده‌ست زوڵم رایانكردبوو، دوێنێ بانگه‌شه‌ی ئازادی و رزگاركردنی گه‌ل و ولاَتیان ده‌كرد، ئه‌مڕۆ به‌شێوه‌یه‌كی كاتی له‌سه‌ر كورسییه‌ك دانران و پۆستێكیان خرایه‌ به‌رده‌ست، نه‌یانتوانی به‌ پاكی و به‌بێ دزیكردن بیپارێزن، ئه‌ی ئه‌و كاته‌ی ئه‌و پۆستانه‌ به‌شێوه‌یه‌كی فه‌رمی و به‌ جیگیری، بۆیان ده‌سنیشان ده‌كرێ ده‌بێ چی بكه‌ن؟!
سه‌رۆكی لێژنه‌ی نه‌زاهه‌ كه‌ بۆ دژایه‌تیكردنی گه‌نده‌ڵی دروستكراوه‌، خۆی به‌ گه‌نده‌ڵی تۆمه‌تبار كرا و له‌ لێژنه‌كه‌ وه‌ده‌رنرا.
"ئه‌سعه‌د هاشمی " وه‌زیری رۆشنبیری یه‌كێك له‌ حكومه‌ته‌ كاتییه‌كانی دوای سه‌دام، به‌تۆمه‌تی كوشتنی دوو كه‌س، فه‌رمانی له‌ سێداره‌دانی بۆ ده‌رچوو.
چۆن له‌م ولاَته‌ بێهیوا نابی كه‌ وه‌زیری رۆشنبیرییه‌كه‌ی، له‌جیاتی بلاَوكردنه‌وه‌ی رۆشنبیری و بیری میانڕه‌وی و دووركه‌وتنه‌وه‌ له‌تیرۆر و تووندتیژی، خۆی بكوژ و تیرۆرست ده‌رچێت. سه‌رۆكی لێژنه‌ی له‌ناوبردنی گه‌نده‌ڵی، گه‌نده‌ڵ ده‌رچێت؟!
ئه‌و كه‌سه‌ش كه‌ له‌ ده‌ره‌وه‌ بۆ رزگاركردنی ئێمه‌ هات "ئه‌مه‌ریكا "، به‌ئاشكرا و به‌به‌رچاوی هه‌موو جیهان، له‌جیاتی نه‌ك دروستكردنی ئه‌و به‌هه‌شته‌ی كه‌ هاتبوو دروستی بكات، به‌ڵكو ته‌نها له‌ جیاتی نه‌هێشتنی شه‌ڕوئاژاوه‌كان، خه‌ریكی ئه‌وه‌یه‌ چه‌ك به‌ عێراق ده‌فرۆشێ.
به‌پێی بۆندێك كه‌ له‌ نێوان عێراق و ئه‌مه‌ریكا مۆركراوه‌، ئه‌مه‌ریكا بایی (3)ملیار دۆلار چه‌ك ده‌فرۆشێته‌ عێراق، چه‌كه‌كانیش بریتین له‌: تانك و فڕۆكه‌ و هه‌لیكیۆپته‌ر و مووشه‌ك و... بڕیاریش وایه‌ بایی (7) ملیار دۆلاری دیكه‌ی پێ بفرۆشێ، واتا به‌ كۆی گشتییه‌كه‌ی ده‌كاته‌ نزیكه‌ی (10) ملیار دۆلار، ئه‌م بڕه‌پاره‌یه‌ش، زیاتره‌ له‌ بودجه‌ی كوردستان و بودجه‌ی ولاَتانێكی وه‌كو سوریا و ئه‌رده‌ن، ئه‌گه‌ر ئه‌م پاره‌ زه‌خمه‌ له‌ كه‌رتێكی وه‌كو كاره‌با سه‌رف بكرێت، به‌دڵنیاییه‌وه‌ كێشه‌ی كاره‌با به‌ته‌واوی بنبڕ ده‌كرێت، یان چه‌ند شارێكی ئه‌م ولاَته‌ی پێ ئاوه‌دان ده‌كرێته‌وه‌. به‌ڵێ ئه‌و هێزه‌ی هاتبوو ولاَتمان بۆ بكاته‌ به‌هه‌شتی دیموكراسییه‌ت و ئاوه‌دانی بكاته‌وه‌، ئێستا به‌ فرۆشتنی چه‌ك پاره‌كه‌مان له‌ژێر ده‌ست ده‌ردێنێ، بۆئه‌وه‌ی یه‌كتری پێ بكوژین و شه‌ڕوشۆڕه‌كان نه‌بڕێنه‌وه‌!!! ئاخر كه‌ ئه‌و هه‌موو چه‌كه‌مان ده‌رخوارد بده‌ن، چۆن وه‌زیری رۆشنبیری تیرۆرست و سه‌رۆكی لێژنه‌ی نه‌زاهه‌ش گه‌نده‌ڵ ده‌رناچن؟!!
سه‌نگه‌ر زراری
sangarzrary@gmail.com