له‌په‌راوێزی‌ جێبه‌جێكردنی‌ پرۆژه‌كه‌ی‌ مام جه‌لالدا بۆ جیاكردنه‌وه‌ی‌ حزب‌و زانكۆكان
له‌كۆلێجی‌ ته‌كنیكی‌ به‌رپرسێكی‌ سیاسی‌و نوێنه‌رێكی‌ ته‌عینكراو پێشێلكاری‌ ده‌كه‌ن

((ده‌‌رباره‌‌ی زانكۆ‌و مه‌‌عهه‌‌ده‌‌كان
1-پێویسته‌‌ رێز له‌‌سه‌‌ربه‌‌خۆیی زانكۆكان ‌و مه‌‌عهه‌‌ده‌‌كان بگیرێت ‌و ئه‌‌م راستی یه‌‌ ‌وه‌‌ك سه‌‌ره‌‌تایه‌‌كی گرنگ ‌و شه‌‌رتێكی سه‌‌ره‌‌كی گه‌‌شه‌‌پێدانی زانكۆكان ‌و مه‌‌عهه‌‌ده‌‌كان ره‌‌چا‌و بكرێت، ئێمه‌‌ پێویستمان به‌‌مه‌‌ هه‌‌یه‌‌ كه‌‌ ‌وه‌‌ك ‌وڵاتانی پێشكه‌‌‌وتو‌و ژیانی زانكۆیی ‌و ئازادی ‌و سه‌‌ربه‌‌ستییه‌‌كی زانكۆیی دابین بكه‌‌ین.
2-نابێ رێكخستنه‌‌كانی حزبی ده‌‌ست له‌‌كار‌وباری زانكۆ‌و مه‌‌عهه‌‌ده‌‌كان ‌وه‌‌ربده‌‌ن، یان شه‌‌رت ‌و دا‌وایان به‌‌سه‌‌ردا بسه‌‌پێنن، یان ده‌‌ستوه‌‌رده‌‌ن له‌‌دانانی مامۆستاكان ‌و سه‌‌رۆكی به‌‌شه‌‌كان، یان شه‌‌رت ‌و شر‌وت دانان بۆ تاقیكردنه‌‌‌وه‌‌كان ‌و چالاكییه‌‌كانی زانكۆ‌و مه‌‌عهه‌‌ده‌‌كان.
مام جه‌‌لال - سكرتێری گشتی‌ ی‌.ن.ك 18/12/2008))

كه‌متر له‌مانگێك تێپه‌ڕیوه‌ به‌سه‌ر ئه‌م بانگه‌شه‌و په‌یامه‌ی‌ به‌رێز مام جه‌لالدا، كه‌زۆر به‌تایبه‌تی باس له‌جیاكردنه‌وه‌ی‌ حزب‌و زانكۆكان ده‌كات، كه‌چی له‌كۆلێجی ته‌كنیكی‌ سلێمانی‌، نوسراو ئاڕاسته‌ی‌ راگرایه‌تی‌ ئه‌و كۆلێجه‌ ده‌كرێت كه‌ده‌بێ به‌هیچ شێوه‌یه‌ك رێگا به‌رێكخراوه‌كه‌ی‌ ئێمه‌ نه‌درێت‌و له‌لایه‌ن رێكخراوێكی‌ تریشه‌وه‌ پۆسته‌ره‌كانی لێده‌كرێنه‌وه‌‌و سوكایه‌تییان پێده‌كرێت.. كه‌ئه‌مه‌ جاری‌ یه‌كه‌م نییه‌ به‌ڵكو چه‌ند جارێكی‌ دیكه‌ به‌ته‌ده‌خولكردنی‌ راسته‌وخۆو چاوسوركردنه‌وه‌و هه‌ڕه‌شه‌ی‌ ده‌ركردن‌و لابردن له‌به‌رپرسانی‌ كۆلێجه‌كان رێیان له‌چالاكییه‌ خوێندكارییه‌كانی‌ ئێمه‌ گرتووه‌.یاخود به‌ناراسته‌وخۆ له‌رێی‌ نوێنه‌ره‌ ته‌عینكراوه‌كانیانه‌وه‌.
له‌كاتێكدا پۆسته‌ری‌ چالاكییه‌ وه‌رزشییه‌كانمان له‌ كۆلێجی‌ ته‌كنیكی‌ له‌ رۆژی‌ (14/1/2009) له‌لایه‌ن چه‌ند خوێندكارێكی‌ مه‌كته‌بی رێكخراوه‌كانی‌ (ی.ن.ك)ه‌وه‌ لێده‌كرێنه‌وه‌و ده‌دڕێندرێن‌و له‌لایه‌ن نوێنه‌ری‌ ته‌عینكراوه‌وه‌ بۆ خوێندكاران به‌بیانوی‌ جیاواز ته‌بریری بۆ ده‌هێنرێته‌وه‌. ئێمه‌ هه‌قی خۆمانه‌ بپرسین:
 كامه‌ به‌رپرسی حزبی زات ده‌كات ته‌ده‌خول له‌كاری‌ زانكۆو كۆلێجه‌كاندا بكات‌و سه‌رپێچی له‌رێنماییه‌كانی‌ مام جه‌لال بكات‌و سه‌روه‌ریی ناوه‌نده‌كانی‌ خوێندن پێشێلبكات؟
 كامه‌ شه‌رعیه‌ت رێگه‌ی‌ به‌رێكخراوی‌ كۆمه‌ڵه‌ی‌ خوێندكارانی‌ كوردستان داوه‌و رێگه‌ی‌ له‌ ئێمه‌ گرتووه‌؟
 كامه‌ شه‌رعیه‌ت رێگه‌ی‌ داوه‌ به‌ كۆمه‌ڵه‌ی‌ خوێندكاران نوێنه‌ری‌ خوێندكاران ته‌عین بكات‌و كامه‌ شه‌رعیه‌ت له‌ئێمه‌ی‌ قه‌ده‌غه‌كردووه‌ بۆمان نه‌بێ بێ پرس‌و رای‌ ئه‌و ته‌عینكراوانه‌ چالاكی بۆ خزمه‌تی‌ تواناكانی‌ خوێندكاران بكه‌ین؟
به‌داخه‌وه‌ وه‌ك چۆن ده‌سه‌ڵاتی‌ سیاسی‌و ئیداری‌ قۆرخكراوه‌، نوێنه‌رایه‌تیكردنی‌ چین ‌و توێژه‌كانی‌ كۆمه‌ڵیش قۆرخكراوه‌، ئه‌وه‌تا ماوه‌ی‌ (5) ساڵه‌ هه‌ڵبژاردنی‌ نوێنه‌رایه‌تیی خوێندكاران له‌زانكۆو ناوه‌نده‌كانی‌ تری‌ خوێندندا ناكرێت‌و به‌ئیتیفاقی‌ سیاسی كادری‌ حزبی بۆ ته‌عینده‌كرێت. كه‌ئه‌مه‌ بێشه‌رمی‌ كردنه‌ به‌رامبه‌ر خوێندكارانی‌ كوردستان، له‌م میانه‌یه‌دا روو ده‌كه‌ینه‌ ئه‌وانه‌ی‌ به‌م كاره‌ نادروسته‌ هه‌ڵده‌ستن‌و نوسراوی‌ حزبی ده‌كه‌نه‌ سه‌ر زانكۆو ناوه‌نده‌كانی‌ خوێندن، پێیان ده‌ڵێین: گه‌ر تۆزقاڵێ متمانه‌تان به‌و نوێنه‌رایه‌تییه‌ ته‌عینكراوه‌ ناشه‌رعییه‌ی‌ خۆتان هه‌یه‌، ئه‌وه‌ هه‌ڵبژاردن ‌و سندوقه‌كانی‌ ده‌نگدان، بفه‌رموون با به‌ئازادانه‌ خۆمانی‌ تیا تاقیكه‌ینه‌وه‌. ئه‌و كاته‌ گه‌ر هه‌ڵبژێردران، ئه‌وا مافی خۆتانه‌ ببنه‌ زمانحاڵ‌و قسه‌ی‌ زۆر له‌وه‌ گه‌وره‌تریش بكه‌ن كه‌ئێستا ده‌یكه‌ن.
ئێمه‌ چالاكی مه‌ده‌نی‌‌و دیموكراتیانه‌ی‌ خۆمان له‌چوارچێوه‌ی‌ یاسادا به‌مافێكی‌ بنه‌ره‌تی‌ ده‌زانین، یاساش ناكرێت لاستیك بێ‌و بۆ هه‌ر كه‌سێك به‌شێوه‌یه‌ك بڕیاربدات. مافی خۆمانه‌ وه‌ك رێكخراوێكی‌ خوێندكاری‌ كه‌مۆڵه‌تی‌ یاساییمان هه‌یه‌ چالاكییه‌كانمان په‌ره‌پێبده‌ین، وه‌ خوێندكارانیش دڵنیا ده‌كه‌ینه‌وه‌ كه‌به‌رده‌وامده‌بین له‌م چالاكییانه‌دا، تا خواسته‌كانمان له‌هه‌ڵبژادرنی‌ ئازادانه‌و ئازادكردنی‌ زانكۆكان به‌ده‌ست دێنین ‌و هه‌ڵوێستی‌ له‌م جۆره‌ش هه‌ر له‌نوسراوكردنه‌ سه‌ر زانكۆكانه‌وه‌ تا دڕاندنی‌ پۆسته‌ره‌كانمان به‌تواناو دڵسۆزیی خۆمان له‌خزمه‌تی‌ خوێندكاراندا لێكده‌ده‌ینه‌وه‌و فشاری‌ مه‌ده‌نی‌ زیاتر ده‌كه‌ین تا دیموكراتی‌ راسته‌قینه‌ به‌رقه‌رارده‌كه‌ین.
هیوادارین به‌رێز مام جه‌لال، له‌م كێشه‌یه‌ بكۆڵێته‌وه‌و به‌پێشێلكارییه‌كی‌ ته‌واوی‌ یاساو حورمه‌تی‌ زانكۆو پرۆژه‌كه‌ی‌ خۆی له‌قه‌ڵه‌می‌ بدات‌و ئیجرائاتی‌ پێویستی‌ بۆ ئه‌نجامبدات.

.رێكخراوی‌ سۆڵیدارێتیی خوێندكاران
ئۆفیسی‌ سه‌ره‌كی‌
2009 / 1 /15