ویژدانه ‌په‌رشوبڵاوه‌کان ، مێژووی دیمه‌نێکی سه‌رکه‌وتوو و ناوه‌رۆکێکی شکستخواردوو ده‌گێرنه‌وه‌!؟

رۆژنامه‌گه‌ری کوردی نه‌پساو تائێستا خۆی به‌ریتمێکی کارکردن خه‌ریککردووه‌ که‌هیچ په‌یوه‌ندیه‌کی به‌نه‌مه‌تی به‌دواداچونی رووداوه‌کان وپشکینین گۆڕانکارییه‌کان نه‌بووه‌ ، ئه‌مرۆ به‌هۆی گه‌ران وبه‌دواداچوون له‌رووداوه‌کانی به‌رله‌چاره‌گه‌سه‌ده‌یه‌کدا له‌پرۆفایلێکدامێژووی تۆز له‌سه‌ر نیشتوی دروستبوون ی حیزبێک که‌ئه‌مرۆ له‌ترۆپی ده‌سه‌ڵاتی سیاسیداخۆی ده‌بینێته‌وه‌، هه‌ڵده‌داته‌وه‌.
ـ نوسینه‌وه‌ی مێژووی دروستبوونی کۆمه‌ڵه‌ی مارکسی لینین ی دواتریش یه‌کێتی نیشتمانی ، به‌شێکی به‌دواندنی ئه‌وکاره‌کته‌رانه‌ی که‌به‌شێوه‌یه‌ک له‌شێوه‌کان رۆڵ گێراندن و شاهێدحاڵی ئه‌و هه‌گبه‌ مێژوویه‌ن کامڵ ده‌بێت . هاوکات ئه‌م کاره‌ ئاوردانه‌وه‌یه‌ک له‌وکه‌سایه‌تییانه‌ی که‌ خۆیان له‌ده‌سه‌ڵاتی سیاسیدا نه‌ماوون ، ویژدانێکی په‌رشوبڵاوی مێژوون ، له‌په‌راویزی ده‌سه‌ڵاته‌وه‌ مێژووی رۆژانی سه‌ختی دیمه‌نێکی سه‌رکه‌وتوو وناوه‌رۆکێکی شکست خواردوو ده‌گێڕنه‌وه‌.

لێره‌وه‌ پرۆژه‌ی دواندنی ویژدانه‌ په‌رشوبڵاوه‌کان به‌ ( سه‌لامی مه‌لا‌ ئه‌حمه‌د گه‌رمیانی ) ناسراو به ‌"سه‌لامی خه‌یات" ده‌ستپێده‌کات .


ئه‌و له‌دایکبووی ساڵی 1946 ـ سلێمانییه‌ . سه‌ره‌تای تێکه‌ڵی و بوون به‌ئه‌ندام له‌ناو( بازنه‌ی روناکبیری کۆمه‌ڵه‌ی مارکسی لینینی ـبیروباوه‌ری ماوتسیتۆن )ده‌گه‌رێته‌وه‌ بۆ یه‌که‌م په‌یوه‌ندیکرن پێی له‌رێگه‌ی (عومه‌ری سه‌یدعه‌لی) له‌ساڵی 1970 ـ 1971 دا له‌وێوه‌ ئیتر ( سه‌لامی خه‌یات) له‌گه‌ڵ کۆمه‌ڵه‌دا تێکه‌ڵ ده‌بێت و دوکانی خه‌یاتیه‌که‌شی ده‌بیته‌ شوێنی یه‌کبینینی هاورێیانی کۆمه‌ڵه‌ تائه‌و ئاسته‌ی دوکانه‌که‌ی هێنده‌ی سیمای باره‌گایه‌کی حیزبی له‌خۆده‌گرێت هێنده‌ له‌دوکانێکی خه‌یاتی ناچێت ،دواتر کۆمه‌ڵه‌ ناچارده‌بێت بۆ پاراستنی نهێنی وگیانی کادیره‌کانی ته‌عمیمێک ده‌ربکات که‌ هاتوچۆکردنی دوکانی سه‌لامی خه‌یات به‌هه‌موو شێوه‌یک قه‌ده‌غه‌یه‌ . پاشان له‌شام له‌ کۆتایی ساڵی 1975 تا 1977له‌ ریزه‌کانی یه‌کێتدا و نزیک به‌ مام جه‌لال کار ده‌کات و ده‌بێته‌ به‌رپرسی په‌یوه‌ندیه‌کانی مام جه‌لال به‌ناوه‌ی کوردستان .ئه‌مرۆ له‌گێرانه‌وه‌ی رووداوه‌کانی ئه‌ومێژووه‌، به‌رله‌هه‌موو شتێک داوای لێبوردن له‌وکه‌سانه‌ده‌کات که‌ بێ پرسی خۆیان ناویان ده‌هێنرێت ، دواتر له‌گه‌ڵماندا ده‌بێته‌ شاهێدحاڵی سه‌فه‌رێکی دووری پرله‌رووداووی به‌گژداچوو ، پڕ له‌هه‌ڵبه‌زین و دابه‌زین ، سه‌لامی خه‌یات له‌م چاوپێکه‌وتنه‌دا له‌هه‌ڵه ‌فیکری‌یه‌کانی کۆمه‌ڵه‌، رۆڵی مام جه‌لال له‌کۆمه‌ڵه‌دا،کێشه‌و ناکۆکییه‌کان ، ده‌سته‌گری وناپاکییه‌کان ، ئاشبه‌تاڵ و پاڵه‌وانه‌کان ، نه‌وشیروان ومامجه‌لال ، تاده‌گاته‌ دواساتی ماڵ ئاوای له‌سیاسه‌ت به‌حه‌سره‌ته‌وه‌ بێ هیچ سڵمینه‌وه‌یه‌ک وه‌ڵامی پرسیاره‌کانی ده‌دایه‌وه‌. ده‌بێت ئه‌وه‌ش بڵێن که‌سه‌لامی خه‌یات بۆ یه‌که‌مین جاره‌ رێگه ‌ده‌دات رۆژنامه‌وان له‌مه‌مله‌که‌تی ڕووداوه‌کان به‌ئاگا بن پێشتر به‌هه‌موو جۆرێک له‌دژی گێراندنه‌وه‌ی ئه‌و به‌سه‌رهاتانه‌ بووه‌.
کۆمه‌ڵه‌ له‌نێوه‌ندی دوو ئاشبه‌تاڵدا دروست بوو
کۆمه‌ڵه‌ له‌ ئاشبه‌تاڵێکدا دروستبووه‌ وه‌له‌ ئاشبه‌تاڵێکی تریشدا گه‌شه‌ی کردووه‌ له‌ کۆتای ساڵی 1969 کۆمه‌ڵێک خه‌ڵک چ له‌ کوردستان و چ له‌ به‌غدا که‌وتبوونه‌ بیروبۆچوون گۆرینه‌وه‌، دواتر له‌ سه‌ره‌تاکانی ساڵی 1970 ئه‌و کۆمه‌ڵه‌ رۆشنبیره‌ ده‌ستیانکرد به‌ په‌یوه‌ندی به‌ خه‌ڵکه‌وه‌ بۆ دامه‌زراندنی کۆمه‌ڵه‌.‌ ئه‌و کۆمه‌ڵه‌ رۆشنبیره‌ زۆر به‌باشی توانیان ئه‌و بۆشاییه‌ سیاسییه‌ی که‌ دروستببوو بیقۆزنه‌وه‌. به‌ڵام به‌داخه‌وه ئێستا دان به‌وه‌دا ده‌نێم که‌ له‌رووی فکره‌وه‌ ئێمه‌ کوردایه‌تیمان نه‌ده‌کرد.
ئه‌ی که‌کوردایه‌تیتان نه‌کردووه‌ چیتان کردووه ؟!‌
ئه‌گه‌ر سه‌یری نوسینه‌کانی کۆمه‌ڵه‌ بکه‌یت، له‌جۆر وشێوازی په‌یوه‌ندی کردن به‌خه‌ڵکه‌وه‌ بکۆڵێنه‌وه‌ له‌میکانزم وهاندانی خه‌ڵک بۆ کۆمه‌ڵه‌ بپێجینه‌وه‌ ئه‌وه‌ به‌دی ده‌که‌ین که‌ خۆمان هه‌ڵواسی بوو به‌ئومومیه‌تدا خۆمان هه‌ڵواسیبوو به‌بیری ماوستیتۆن خۆمان هه‌ڵواسیبوو به‌کێشه‌ی فه‌له‌ستین به‌کێشه‌ی کۆمبۆدیاو لاوس وئه‌ریتریاو ..هتد که‌ئه‌مانه‌ به‌هیچ، شێوه‌یه‌ک ته‌نانه‌ت نزیکترین هاوسێمان که‌ فه‌له‌ستینه‌ ئاگایان له‌که‌یسی کوردی نه‌بوو.
کۆمه‌ڵه‌ ئه‌گه‌رکوردایه‌تی بکردایه‌ ، وه‌خۆی به‌شتی لاوه‌کی خه‌ریک نه‌کردایه‌ ،له‌خزمه‌تی چه‌مکه‌ نیشتیمانییه‌کان کارمان بکردایه‌ ره‌نه‌گ بوو ئێستا که‌یسی کوردی له‌رووی سیاسیه‌وه‌ زۆر له‌به‌ره‌و پێشتر ده‌بوو، پاشان ئه‌ورێکخستنه‌ی که‌ئێمه‌ خه‌ڵکمان تێدا رێکخستبوو‌، ئه‌و بیرو باوه‌ری که‌ئێمه‌ هه‌مانبوو‌ دواتریش ئه‌وانه‌ی که‌بوونه‌ خاوه‌نی کۆمه‌ڵه‌ زۆر دوور بوون له‌ئیمه‌وه‌.
ئه‌و زاتانه‌ کۆمه‌ڵه‌یان به‌رێگایه‌کی تردا برد و دواتر کۆمه‌ڵه‌یان هه‌ڵوه‌شانده‌وه‌، کۆمه‌ڵه‌ وه‌رچه‌رخانێکی له‌مێژووی کورد دا تۆمارکرد ، به‌که‌م سه‌رکرده‌و ‌رێکخراوی تر کراوه‌ ،
ـ ئه‌گه‌ر سه‌یری هێزی به‌عس بکه‌ین له‌و سه‌رده‌مه‌دا که‌زلهێزه‌کان چۆن به‌هایان بۆ داده‌نا، پاشان ئه‌وئاشبه‌تاڵه‌ گه‌و‌ره‌ییه‌ی که‌ ماڵی مه‌لا مسته‌فاکردییان به‌ دووسه‌دـ تاسێ سه‌د هه‌زار پێشمه‌رگه‌ی ئیحتایته‌وه‌ ،چوارسه‌د هه‌زار چه‌کی یه‌ده‌گه‌وه‌ جگه‌ له‌وهه‌موو ته‌قه‌مه‌نییه‌ی که ‌له‌به‌رده‌ستییان دابوو هه‌روه‌ها ساحیبی سه‌دملیۆن دیناری ئه‌وکات بوون ئاشبه‌تاڵیان کرد ، به‌ڵام کۆمه‌ڵه‌ سه‌لماندی بۆ میژوو بۆ چوارده‌ور که‌ رێکه‌وتنه‌کان هه‌مووی بێ مانان کۆمه‌ڵه‌ به‌چوارده ‌که‌سه‌وه‌، توانی بچێته‌ شاخ ئه‌و چوارده‌یه‌ به‌هه‌ر هه‌موویان شه‌ش تفه‌نگی پێ بووه، ماڵی مه‌لا مسته‌فا به‌وهه‌موو هێزو پاڵپشتی جه‌ماوه‌رییه‌وه‌که‌ هه‌یانبوو نه‌یانتوانی به‌رگه‌ی رێکه‌وتن نامه‌یه‌کی ساکار خۆرابگرن وه‌ک وکه‌خۆشیان خۆراگر نه‌بوون رێکه‌وتنی جه‌زائیریان له‌خه‌ڵکی کردبوو به‌ئه‌فسانه‌یه‌کی ترسناک کۆمه‌ڵه‌سه‌لماندی که‌ئه‌ورێکه‌وتنه‌ به‌وشێوه‌یه‌ نه‌بوو.که‌ کۆمه‌ڵه‌‌ چووبوه ‌ده‌رێ خۆ رێکه‌وتننامه‌ی جه‌زائیر هه‌رهه‌بوو، ئه‌ی بۆ ئه‌وکاریگه‌رییه‌ی نه‌بوو که‌ خه‌ڵکیان پێده‌تۆقاندبوو،کۆمه‌ڵه‌ له‌سه‌خترین کاتی خه‌باتیدا زۆر له‌ سه‌رکرده‌کانی شه‌هیدبوون، ده‌ربه‌ده‌ر بوون ، به‌ڵام چونکه‌ ، واپه‌روه‌رده‌کرابوون ، توانیان سه‌رکرده‌کانیش دروستبکه‌نه‌وه‌ ، خۆشێان له‌هه‌مانکاتدابوونه‌ قاعیده‌و وره‌ی خه‌ڵکیان به‌رزکرده‌وه‌.

ئه‌مجۆره‌ به‌هه‌ڵه‌بردنه‌ کارکردن بۆ ئومه‌میه‌ت نه‌ک کوردایه‌تی کاریگه‌ری کێ وچی بوو ؟

‌ وه‌ک شه‌خس من رۆڵم تێدا نه‌بووه‌ ، به‌ڵام بیرکردنه‌وه‌ی ئه‌وکاتی کۆمه‌ڵه‌ بۆچی وای له‌وخه‌ڵکه‌ کرد؟ بۆچی به‌وفیکره‌ هاتنه‌ ناوخه‌ڵکه‌وه‌!؟ ئه‌وا ده‌ڵێم کۆمه‌ڵێک هۆکاری باسنه‌کراو هه‌بوون له‌وانه‌ سۆڤیه‌ت رۆڵێکی نێگه‌تیڤی ده‌بینی له‌ ناوچه‌که‌دا هه‌روه‌ها خه‌ڵک بیروبۆچونی ماوسیتۆنگی به‌ ئه‌ڵته‌رناتیڤی سۆڤیه‌ت داده‌نا. دوای ئه‌وه‌ ناره‌زایی چین له‌ هه‌ڵسوکه‌وتی سۆڤێتی ئه‌وسا رۆڵی هه‌بوو به‌سه‌رکۆمه‌ڵه‌‌ که‌ به‌وشێوه‌یه‌ بیر بکاته‌وه‌ به‌راستی ئێمه‌ ده‌روێش بووین.
ده‌روێشیک به‌بێ ئه‌وه‌ی ئاگای لێ بێت شێخه‌کانی خه‌ریکی چین !؟

به‌بێ ئه‌وه‌ی له‌وه‌بکۆڵینه‌وه‌ ئه‌وانه‌ چی ده‌زانن له‌سه‌ر داخوازییه‌کانی ئێمه‌ . یان ئه‌وانه‌ چ دلسۆزییه‌کیان هه‌یه‌ بۆ مه‌سه‌له‌ی کورد ئێمه‌ خۆمان پێ هه‌ڵواسیبوون ته‌نانه‌ت من ئاگادارم کاتی خۆی هه‌موو ره‌خنه‌ی کۆمه‌ڵه‌ له‌مام جه‌لال پێش ئه‌وه‌ی بێینه‌ ده‌رێ له‌وه‌بووه‌ که‌ مام جه‌لال بۆچی سه‌فیری ئه‌مریکی له‌لبنان بینیوه‌. ئه‌مانگوت شتێکی باشی نه‌کردووه‌ ، ئێمه‌ له‌سیاسه‌تمان نه‌ده‌زانی . هه‌نوکه‌ من له‌گه‌ڵ هه‌موو جۆره‌ په‌یوه‌ندییه‌کم له‌گه‌ڵ هه‌مووکه‌س و لایه‌نێک به‌مه‌رجیک له‌به‌رژه‌وه‌ندی ئاسایشی نه‌ته‌ویدا بێت. ئینجا کۆمه‌ڵه‌ ماوه‌یه‌کی کورتی به‌ده‌سته‌وه‌ بوو، کۆمه‌ڵه‌ بێ شانس بوو له‌ دووسێ خاڵدا یه‌که‌میان مفاوه‌زاتی نێوان به‌عس وماڵی مه‌لامسته‌فا کورت بوو چوار ساڵ بوو درێژتر بوایه‌ ئێمه‌ زۆرتر سودمان لێده‌کرد

کۆمه‌ڵه‌ که‌ ئه‌و نمونه‌ سه‌رکه‌وتووه‌ بێت ، له‌ناوخۆی رووداوه‌کاندا له‌کوێدا شکستخواردوو بووه‌!؟
یه‌که‌م : له‌روووی ئه‌وه‌ی خه‌ڵک به‌ئاگابهێنین که‌ به‌عس هیچ بۆ کورد ناکات، و وه‌خت ده‌بات به‌سه‌ر ، ئه‌و هه‌موو پیلانه‌ گه‌وره‌یه‌ ده‌کات دژی کێشه‌ی کوردی. ئه‌وه‌مان بۆ خه‌ڵک روونده‌کرده‌وه،‌ ئه‌و به‌ڵگانه‌مان به‌ده‌سته‌وه‌ بوو که‌ خه‌ڵکی پێ ئیقناع بکه‌ین.
دووه‌م: به‌رپرسانی ماڵی مه‌لامسته‌فا هه‌موو خه‌ریکی خۆده‌وڵه‌مه‌ندکردن بوون ئێواره‌خوان بوون. هه‌ندێکیشیان له‌ژێره‌وه‌ ببوون به‌به‌عسی. هه‌موو ئه‌مانه‌مان به‌ده‌سته‌وه‌ بوو به‌داخه‌وه‌ ماوه‌که‌ که‌م بوو .
سێهه‌م: هه‌رچه‌نده‌ باش نییه‌ بلێن شه‌ڕ درێژه‌ی بخایاندایه،‌ چونکه‌ هه‌میشه‌ شه‌ر ماڵوێرانیه‌ ، وه‌لێ بۆ ئه‌وقۆناغه‌ درێژخایه‌نی شه‌ڕ له‌گه‌ڵ به‌عسدا گرنگ بوو ، به‌دوای هه‌رسه هێننای دانوستان ماوه‌که‌ کورت بوو ئێمه‌ که‌ دروستبووین بواره‌که‌ زۆر بوو بۆ جه‌ماوه‌ر په‌یداکردن له‌دوو رووه‌وه،‌ یه‌که‌میان به‌و خه‌ڵکه‌مان نیشانده‌دا‌ که‌به‌عس به‌چ فاشیه‌که‌وه‌ کوردستان ئه‌فه‌وتێنێت ،کوردستان وێران ده‌کات ‌ دووهه‌میان روونمانده‌کرده‌وه‌ که‌ چۆن ئه‌وانیش ته‌نها بنکه‌وباره‌گای چوارده‌وری خۆیان ئه‌پارێزن و هه‌موو کوردستانیان فه‌رامۆش کردووه.‌ روون بوو ماڵی مه‌لامسته‌فا هه‌موو هێزه‌کانیان له‌ناوچه‌کانی خۆیان گرمۆڵه‌دابوو ئه‌وناوچانه‌ی تریش هه‌مووی په‌رش و بڵاو بوو په‌راوێزخرابووئه‌وه‌شمان له‌یا ده‌نچیت که‌ له‌و قۆنا‌غه‌دا ئێمه‌ کۆمه‌ڵه‌ بووین به‌ڵام خۆمان ئاشکرانه‌کردبوو.
له‌گه‌ڵ ئاشبه‌تاڵدا چۆن مامه‌ڵه‌تان کرد
له‌ چوونه‌ده‌روه‌ماندا بۆ ناو شۆرش له‌ ساڵی 1974دا، ئێمه‌ رێنماییمان بۆ هاتبووه‌ تێدا ده‌ڵێت ئه‌وه‌ی که‌ترسی له‌خۆیه‌تی له‌شار نه‌مێنێته‌وه و ‌ ئه‌وه‌ی ‌ ده‌زانێت‌ ترسی له‌سه‌ر نییه‌ بمێنێته‌وه‌. له‌ده‌روه‌ پێشمه‌رگه‌بووین ته‌علیماتمان بۆ هاتبوو که‌ خۆمان بپارێزین له‌مردن رووبه‌روی شه‌ر نه‌بینه‌وه‌ ، بۆ ئه‌وه‌ی کادیره‌کان تیانه‌چن له‌گه‌ڵ ئه‌وه‌شدا ده‌بوایه‌ ببینه‌ پێشمه‌رگه‌، ئه‌وه‌ش ماوه‌که‌ کورت بوو ساڵی خایه‌ند ئه‌وه‌بوو ئاشبه‌‌تاڵێکی گه‌وره‌ روویدا ، ره‌نگه‌ ئیستا ئیوه‌ لاتان سه‌یر بێت که‌ من زۆر ده‌ڵێم ئاشبه‌تاڵ، له‌راستیدا لێره‌دا ده‌مه‌وێت ئه‌وه‌روونبکه‌مه‌وه‌ که‌ زاراوه‌ی ئاشبه‌تاڵ زاراوه‌یه‌ک نییه‌ (سه‌لامی خه‌یات ) دایهێنابێت ئه‌وه‌ له‌گه‌ڵ له‌دایکبوونی ئه‌وروودا‌ ئه‌م ناوه‌شدا له‌دایک بووه‌ ، تاوانی من نییه‌.
جا من لێره‌ ده‌مه‌وێت شتێک روونبکه‌وه‌مه‌وه‌ له‌ سه‌ره‌تای ساڵی 1975دا پێشنیارێک هات که‌ من بچمه‌ ده‌ره‌وه‌ بۆ لای مامجه‌لال

به‌مه‌به‌ستی چی و کێ ئه‌وپێشنیاره‌ی کرد!؟
خاڵه‌شه‌هاب له‌چۆمان پێی گوتم سه‌لام به‌بیانوی سه‌ردانیکردنی براکه‌ت له‌ئه‌ڵمانیا نامه‌یه‌کت بۆ ده‌نوسم له‌سه‌ربارودۆخی کوردستان و کۆمه‌ڵه‌ بیگه‌ێنیته‌ مامجه‌لال، دووشه‌و به‌یه‌که‌وه‌بوین ، له‌پاش نوسینی نامه‌که‌ من به‌ره‌وته‌هران به‌ڕێکه‌وتم به‌نیازی ئه‌وه‌ی له‌وێوه‌ بچمه‌ سوریا، چونی من بۆ ته‌هران هاوکات بوو له‌گه‌ڵ به‌ستنی موئته‌مه‌ری وڵاتانی نه‌ووتفرۆش (ئۆپیک)، شاه له‌گه‌رانه‌وه‌ی له‌کۆنگریه‌کی رۆژنامه‌وانی دا کۆمه‌ڵێک پرسیاریان لێپرسی یه‌کێک له‌پرسیاره‌کان ده‌رباره‌ی بارودۆخ وچاره‌نوسی په‌ناهه‌نده‌کورده‌کان بوو ، له‌کاتی وه‌ڵامی پرسیاره‌که‌ ئێمه‌ له‌ومیوانخانه‌یه‌ بووین که‌پارتی هه‌یبوو له ‌ته‌هران به‌و شێوه‌یه‌ وه‌ڵامی دایه‌وه‌ گوتی:(( ئه‌وه‌ی ده‌یه‌وێت بمێنێته‌وه‌ لێره‌ بمێنێته‌وه‌ ئه‌وه‌شی که‌ده‌چێت ته‌سلیم بێته‌وه‌ بابگه‌رێته‌وه‌ ئێراق و ته‌سلیم ببێته‌وه‌‌)) ئه‌م وه‌ڵامه‌ی شاه زۆر نه‌گه‌تیفانه‌ بوو بۆ کێشه‌ی سیاسی کوردی منیش زۆر سه‌یرم لێهات ، به‌حسابی خۆم نامه‌یه‌کم پێیه‌ بۆ مام جه‌لال و به‌نیازم برۆمه‌ لای مام جه‌لال .باسی شتێکی تر بکه‌ین ، له‌هه‌مانکاتدا مه‌لامسته‌فاو شه‌مسه‌دین موفتی و دکتۆر مه‌حمود هاتن بۆته‌هران هاتبوون که‌شاه ببین دکتۆر مه‌حمود نوسیویه‌تی که‌ شاه چی به‌مه‌لامسته‌فا گوتوه‌ پێویست ناکات من لێره‌ باسی ئه‌وه‌ بکه‌مه‌وه،‌ بۆ به‌یانی دکتۆر مه‌حمود هات بۆ لای ئێمه‌ دکتۆر وه‌زعی ته‌واو نه‌بوو ره‌نگی زۆر سپی ببوو. له‌دکتۆرم پرسی که‌ وه‌زع له‌چی دایه‌!؟ گوتی ( هه‌مووشتێک ته‌واو بوو هیچ نامێنێت)
منیش نامه‌یه‌کی وام پێیه‌ که‌گۆرانکاری به‌سه‌رکوردساتندا دێت بیرم کردوه‌ به‌بێ ئه‌وه‌ی پرسیار بکه‌م یه‌کسه‌ر گه‌رامه‌وه‌ بۆ کوردستان که‌ هاتمه‌وه‌ وه‌زعه‌که‌ زۆر تێکچوو بوو براده‌رانی کۆمه‌ڵه‌ خاڵه‌ شه‌هابوو چه‌ند براده‌رێکی تر له‌ چۆمان وحاجی هۆمه‌رانه‌وه‌ هه‌موو هاتن بۆ پێنجوێن هه‌موو ئه‌ندامانی کۆمه‌ڵه‌ له‌پێنجوێن کۆبونه‌وه‌ خاڵه‌شه‌هابم بینی وپێم گوت نامه‌که‌م نه‌برد هاتومه‌ته‌وه‌ بۆ ئه‌وه‌ی ره‌نه‌گه‌ پێویست بێت‌ گۆرانکارییه‌ک به‌سه‌ر نامه‌که‌دا بهێنیت ،
خاڵه‌شه‌هاب پێی گوتم که‌باشتکردووه‌ نامه‌که‌ت نه‌گه‌یاندۆته‌ مام جه‌لال ته‌نانه‌ت گوتیشی به‌راستی مه‌بده‌ئیانه‌ بیرت کردۆته‌وه‌ وتی ئه‌م شه‌و کۆبونه‌وه‌ه‌یه‌ک ده‌که‌ین له "‌کێلو" (که‌ دێیه‌که‌ بنکه‌یه‌کی کۆمه‌ڵه‌ی لێبوو) کۆبونه‌وه‌که‌ و بریاره‌کانی گرنگترینیان ئه‌وه‌ ده‌بێت که‌ ئێمه‌ مقاوه‌مه‌ بکه‌ین. ناوه‌رۆکی نامه‌که‌ ده‌گۆرم و پاشان ده‌بێت بگاته‌‌ مام جه‌لال.
کۆبونه‌وه‌که‌ بریاره‌کانی چی بوون؟
شه‌و که‌ کۆبونه‌وه‌که‌ کرا بریاردرا بۆ به‌یانییه‌که‌ی خاڵه‌ شه‌هاب و چه‌ند براده‌رێک بچن بۆلای "فه‌تاح ئاغا" و داوای لێبکه‌ن که‌ هاریکاریمان بکات بۆ به‌رهه‌ڵستیکردن. وه‌ڵامه‌که‌ی فه‌تاح ئاغا زۆر نێگه‌تیڤانه‌بوو. پێیگوتبوون (نه‌ک یارمه‌تی بگره‌ دژتان ده‌بم له‌به‌ر ئه‌وه‌ی بارزانی گوتویه‌تی ته‌نها ئێمه‌ بریاری شه‌ر و ئاشتی ده‌ده‌ین).
ئێمه‌ له‌ده‌رێی کۆبوونه‌وه‌که‌ من و عومه‌ری سه‌ید عه‌لی، دارۆ، ئه‌رسه‌لان بایز، سالار عه‌زیز، ته‌ها باراوی، فه‌رهاد شاکه‌لی و دکتۆر ره‌فیق هه‌موو له‌ده‌وری مه‌قه‌ره‌که‌ی "فه‌تاح ئاغا" وه‌ستابووین. پاش گفتوگۆ، کاک عومه‌ری سه‌ید عه‌لی پێمیگوت بچم بۆ ناڵپارێز.
منیش به‌تاقی ته‌نیا چومه‌ ناڵپارێز و چاوه‌رێی گه‌یشتنی هاورێیانم ده‌کرد. شه‌هید ئه‌نوه‌ری مه‌جید سوڵتان له‌وێ بوو پرسیاریلێکردم گوتی ( سه‌لام چی ده‌که‌یت)!؟ منیش گوتم وه‌ڵا چاوه‌رێی دووسێ براده‌رده‌که‌م ئه‌ویش چاوه‌رێ تۆپێکی 106 ده‌کر که‌ناردبووی بۆ سنوری چوارتا بریار بوو ته‌سلیمی ئێرانی بکاته‌وه، پاش که‌مێک کاک "عومه‌ر فه‌تاح" م بینی له‌گه‌ڵ "عوسمانی عه‌به‌ده‌لاک و که‌مالی فیته‌ر". سه‌یاره‌که‌ی عوسمانی عه‌به‌ ده‌لاک له‌ئاوه‌که‌ چه‌قی بوو .. به‌کاک عومه‌رم گوت ( کاک عومه‌ر ئه‌وه‌ بۆکوێ ده‌چیت؟) کاک "عومه‌رفه‌تاح" له‌وه‌ڵامدا گوتی : (ئه‌رۆمه‌وه‌ بۆ سلێمانی ) پێم گوت سلێمانی چی !؟ ، ئێمه‌ موقاوه‌موده‌که‌ین ، گوتی( بۆخۆتانی باده‌ن )
‌ کاتێکم زانی " خاڵه‌ شه‌هاب ـ دارۆ ـ فه‌ره‌یدون عه‌بدوڵقادرـ عه‌مه‌ری سه‌ید عه‌لی ـ ته‌ها باراوی ـ مامۆستا به‌هادین" گه‌یشتن. کاک عومه‌ر، ته‌ها باراوی، مامۆستا به‌هادین و کاک براهیمی ی مسه‌ور دابه‌زین. من چه‌کم پێ بوو ئه‌وانیش چه‌کیان پێ بوو یه‌ک دووچه‌کی زیادیشیان پێ بوو
پرسیارم لێکردن بریار چییه‌ !؟ کاک عومه‌ر پێگوتم که‌بریارمان گۆری به‌وه‌ی که‌ موقاوه‌مه‌ ناکه‌ین گوتم بۆ کتوپر راتان گۆری گوتیان نه‌ک هه‌ر موقاوه‌مه‌ ناکه‌ین بگره‌ بریاریشدرا که‌ بگه‌ڕینه‌وه‌ بۆ لای جه‌ماوه‌ر زوربه‌ی زۆری جه‌ماوه‌ر له‌کوێیه‌ ئێمه‌ بگه‌رێنه‌وه‌ ئه‌وێ جه‌ماوه‌ریش له‌ژێرده‌سه‌ڵاتی حوکمه‌ته‌، ئه‌م بریار گۆرینه‌ به‌ هه‌ره‌شه‌ی پارتی بوو ، چونکه‌ پارتی له‌و سه‌رده‌مه‌دا (ده‌یانگوت ئێمه‌ خۆمان خاوه‌نی شۆرشین هه‌رکه‌سێک بزوتنه‌وه‌ی چه‌کداری بکات ئێه‌م لێی ده‌ده‌ین ئێمه‌ ده‌بێت بریاربده‌ین که‌شۆرش به‌چه‌ک بکه‌ینه‌وه‌ یان نه‌یکه‌ینه‌وه‌ )
ئه‌و شه‌وه‌ ده‌ستامنکرد به‌چه‌ک شاردنه‌وه‌ له "‌ره‌زله"‌. پاشان چووین بۆ به‌رزنجه‌ بۆ ماڵی پوری کاک عومه‌ری سه‌ید عه‌لی و له‌وێش چه‌ند چه‌کێکمان شاردوه‌. بۆ به‌یانی که‌وتینه‌ ری بۆ "کانی درکه"‌ هاتین من کابرایه‌کم ده‌ناسی ناوی ره‌سوڵ شوکوێی بوو، قاچاخچی بوو، هه‌موو ئیشه‌کانی کۆمه‌ڵه،‌ هه‌موونامه‌کان بۆ ناوه‌وه‌ به‌وزاته ‌نێردراون. تانانه‌ت له‌ هێنان و بردنی براده‌ران بۆ ناو شارو بۆ هێنانه‌ ده‌روه‌ متمانه‌یه‌کی زۆرم پێی بوو. کۆمه‌ڵه‌ تاقه‌ یه‌ک تابیعه ‌ورۆنیوۆی هه‌بوو
که‌ ئه‌ویش له‌ماڵی ره‌سوڵ له‌وێ دامنا، گوتم ره‌سوڵ ئه‌مه‌م ئه‌توانیت بۆ بهێنیته‌وه‌ بۆ سلێمانی وتی سه‌لام وه‌عدت ناده‌مێ به‌ڵام محاوه‌له‌ت بۆده‌که‌م، گوتم ئه‌م شه‌و خۆمان به‌ره‌روه‌ بۆ سلێمانی ئێمه‌ نامانه‌وێت ته‌سلیم بین له‌ مه‌لعه‌به‌که.‌ تابیعه‌و رۆنیۆکه‌مان له "‌شوکێو" به‌جێهێشت.
له‌ورۆژه‌سه‌ختانه‌دا ئارپیجیه‌کمان بۆ نه‌کڕا !؟
گه‌نجێک وتی چه‌ند دینارێکم بده‌نێ ئه‌و ئارپی جییه‌ بۆخۆتان منیش به‌ره‌سوڵم گوت ئه‌توانی ئه‌وه‌شمان بۆ بشاریته‌وه‌ گوتی ئه‌وه‌ به‌من ناکرێت به‌راستی ئارپیجیه‌که‌م لێ وه‌رنه‌گرت گه‌راینه‌وه‌.
له‌گه‌راندنه‌وه‌دا که‌وتینه‌ که‌مینی حیزبی شوعیه‌وه.‌ ئه‌وان له‌وسه‌رده‌مه‌دا له‌گه‌ڵ حوکمه‌ت بوون شه‌وان که‌مینیان ده‌رده‌کرد. له‌ڕێگادا گرتیانین "ئیبراهیم ی مسه‌ور" پێی خۆش نه‌بوو به‌رده‌ستی شوعییه‌کان بکه‌وێت وتی شتێکم بۆ بکه‌ن که‌ من نه‌چمه‌ ناومه‌قه‌ری شوعییه‌کان. به‌سه‌رکارێزدا بردیانین ، چه‌کداره‌کانی حزبی شوعی ده‌وریان دابووم که‌ گه‌یشتین به‌ کاک براهیمم گوت تۆ خۆت لابده‌ یان بچۆره‌ ئاوده‌سته‌که‌وه‌، یان خۆتبخه‌ره‌ ‌قه‌ره‌باڵغیه‌که‌وه‌، له‌ده‌روه‌ ئه‌و ده‌رباز بوو. ناسیاو‌ێکی کاک عومه‌ری سه‌ید عه‌لی هات به‌هۆی ئه‌وه‌ به‌ره‌ڵا کراین شه‌و چوینه‌و ‌ماڵه‌وه.‌
که‌ گه‌راینه‌وه‌ بۆ سلێمانی له‌ ناو براده‌رانی سلێمانی ململانێیه‌ک هه‌بوو، ململانێکه‌ فیکری نه‌بوو زیاتر ده‌سته‌گه‌ری بوو. نامه‌یه‌ک نووسرا و بریاری ده‌رکردنی چه‌ند که‌سێکی تیا روونکرایه‌وه‌. نامه‌که‌ نێردرا بۆ به‌غداد دواتر له‌گرتنی شه‌هید ئه‌نوه‌ر زۆراب ئه‌و نامه‌یه‌ش گیرا و ده‌ست حوکمه‌ت که‌وت.
ئه‌وه‌ی ده‌بێت ئاماژه‌ی پێبکه‌م لێره‌دا و بۆ مێژوو بیڵێـم که‌ له‌نێوانی ساڵی 1972 ـ 1973 لیژنه‌ی ئیغتیالاتی کۆمه‌ڵه دروستکرا.
کێبوون ئه‌ندامه‌کانی ئه‌ولێژنه‌یه‌ ؟!
لێپرسراوی لیژنه‌که‌ کاک عومه‌ری سه‌ید عه‌لی بوو، عه‌لی موراد، ئاسۆی شیخ نوری ، که‌مال عه‌لی و سه‌لامی خه‌یات. .به‌ڵام ئه‌م لیژنه‌یه‌ هیچ جۆره‌ئیغتیالاتێکی له‌ناوشاردا نه‌کرد‌.
چه‌که‌کانتان چی بوون وله‌کوێتان بوون ؟!
کاتی خۆی مام جه‌لال کۆمه‌ڵیک ده‌مانچه‌ی جۆری چوارده‌خۆری شاردبووه‌وه‌ ، ئه‌وده‌مانچانه‌ هه‌ندێکی لای ئێمه‌ بوون له‌وکاتانه‌دا که‌ بڵاوکراوه‌ی " ئاڵای سور" مان به‌ناوکادیرانی کۆمه‌ڵه ‌ده‌گواسته‌وه‌ له‌گه‌ڵ خۆماندا هه‌ڵمانده‌گرت.
له‌گه‌راندنه‌وه‌تان بۆ سڵێمانی !؟
پاش ماوه‌یه‌ک خه‌ڵکمان لێگیرا ، به‌یانییه‌ک ئاسۆی شێخ نوری و عه‌لی موراد گیران ماوه‌یه‌کی پێچو حه‌مه‌ی عه‌تێ، دکتۆر جه‌میل ی شێخ عه‌لی، که‌مال عه‌لی و موراد گیران. براده‌رانی به‌غداش هه‌موویان هه‌ڵهاتن بۆسلێمانی، جه‌مالی عه‌لی باپیر رایکرد بۆ له‌سلیمانی و من بردم بۆ ماڵی کاک که‌مالی حه‌بێ و پاشان بۆ ماڵی که‌مالی دارتاش.‌ شوێنمان نه‌بوو که‌س نه‌بوو بمانگرێته‌وه‌ خۆیان. بیستیشمان کۆمه‌ڵێک براده‌ر به‌پێی له‌ به‌غداوه‌ چونه‌ته‌ شام.

رۆژێک سه‌رله‌به‌یانی سالارعه‌زیز هات بۆ دوکان وتم کاک سالار لێره‌ دانیشه‌ تا نه‌خۆشخانه‌ی عه‌بدوڵا لوتفی ده‌چم. ‌له‌ڕیگادا ئیبراهیم خه‌لیل هات به‌ره‌و رووم به‌زۆر شڵه‌ژاوی و زۆر په‌شۆکاوبوو‌ وتم کێ گیراوه؟‌ وتی عومه‌ری سه‌ید عه‌لی و دلێر گیراون. منیش یه‌کسه‌ر گه‌رامه‌وه‌ بۆ دوکان و کاک سالارم برده‌ ماڵی مامۆستا به‌هادین. به ‌سه‌مه‌دی برام گوت ئه‌گه‌ر ئه‌من هاتن خه‌به‌رمان بده‌رێ له‌ده‌وروبه‌ری عه‌سردا سه‌مه‌د هات بۆلام وتی ئه‌وه‌ کاک عومه‌ری سه‌ید عه‌لی له‌به‌رده‌رگایه‌. ئێمه‌ش هاتین و کاک عومه‌رمان بینی. کاک عومه‌ر کاک سالار رۆیشتن.

له‌ورۆژه‌وه‌ ته‌نزیم کۆنه‌ده‌کرایه‌وه‌ کۆکردنه‌وه‌ی ته‌نزیم له‌دوکانه‌که‌ی من بوو خۆشم وه‌زعم خراپ بوو له‌رێگه‌ی برازایه‌کی سلار عه‌زیز ده‌هات بۆ دوکان ببوه‌ حه‌له‌قه‌ی وه‌سڵ. وه‌زعێکی زۆر ناخۆش بوو له‌ سجنه‌و هیچ شتێکی رووی نه‌دا ئیعتیرافات نه‌کرا ، کاتێکم زانی جوابم بۆ هات که‌ "خاڵه‌ شه‌هاب ـ فه‌ره‌یدون عه‌بدوڵقادر ـ عومه‌ر‌ی سه‌ید عه‌لی و کاک جه‌عفه‌ر " چونه‌ته‌ ده‌رێ .
دوای ئاشبه‌تاڵ شتێکمان بۆ هاتبوو ده‌یگوت هه‌رکه‌سێک لێی قه‌وما خۆی بگه‌ێنێته‌ سه‌فاره‌تی سوری له‌هه‌ر وڵاتێک بێت مامجه‌لال ئاگاداری سه‌فاره‌ته‌کانی کردووه یه‌کسه‌ر ده‌تانگه‌ینێته‌ سوریا ، براده‌ران به‌نیاز بوون له‌رێگه‌ی ئێرانه‌وه‌ بچنه‌ سوریا "ئه‌رسه‌لان بایز" "ئاوات غه‌فور" هاتن وتیان سه‌لام بابرۆین بۆسوریا له‌ریگه‌ی ئیرانه‌و تۆ پاسپۆرتت حازره‌ ته‌نانه‌ت پێیان گوتم ئه‌گه‌ر لێقه‌ومانێک، پێویستییه‌ک مان بوو دکتۆر "نه‌جمه‌دین که‌ریم" ی پورت له‌ئێرانه‌ دکتۆری مه‌لا مسته‌فابوو یارمه‌تییه‌کمان ده‌دات منیش گوتم ناوێرم له‌ئێرانه‌وه‌ بێم وه‌رن باله‌ له‌زاخۆوه‌ برۆین ئه‌وان قبوڵیان نه‌بوو دواتر وتییان ئه‌گه‌ر ناییه‌ت له‌گه‌ڵماندا پاره‌مان به‌رێ پاره‌مان پێ نییه‌ منیش 100 دیناری ئه‌وکاته‌م دانێ ، به‌هه‌رحاڵ ئه‌وان رۆیشتن وتاماوه‌یه‌ک هه‌واڵیانم نه‌بوو ئێواره‌یه‌ک له‌دوکان بووم کابرایه‌کی جامانه‌ به‌سه‌ر هات بۆ دوکان وتی تۆ من ناناسیت منیش تۆ ناناسم یه‌ک شتت پێ ده‌ڵێم و ئه‌رۆم، گوتی (براده‌ره‌کانتان ته‌سلیم کراونه‌ته‌وه‌ براده‌ره‌کانتان له‌پێنجوینن وخۆحافیز) رامکرد به‌شوێنیدا هه‌رچه‌ند هاوارم کرد نه‌گه‌رایه‌وه‌ ئه‌وکه‌سه‌ ناوی " حاجی فه‌همی " بوو. به‌حسابی من ئه‌وان له‌سورییان و گه‌یشتونه‌ته‌ لای مام جه‌لال بیرم لێکرده‌وه‌ به‌م ده‌موده‌سته‌ من ده‌ستم به کاک سالار ناگات، به‌په‌له‌ خۆم گه‌یانده‌ لای خاڵی عومه‌ری سه‌ید عه‌لی که‌ له‌رێکخراوی حیزبی شویعیدا کاری ده‌کرد، کابرایه‌کی زۆر مه‌ردبوو بۆ به‌یانی زوو وتم بچین بۆ رزگارکردنیان، حوکمه‌ت زۆر به‌قورس نه‌یگرتووه‌. خاڵی عومه‌ری سه‌ید عه‌لی گوتی من ئاماده‌م. به‌ڵام به‌داخه‌وه‌ که‌سمان بۆ ئاماده‌نه‌کرا. که‌ براده‌رانیان هێانیه‌ سلێمانی هه‌م له‌ریگه‌ی " شازاد سائیب " وله‌رێگه‌ی " حاکام عومه‌ر" که‌دواتر کوشتیان به‌تۆمه‌تی ئه‌وه‌ی سه‌ربه‌حوکمه‌ته،‌ زانیاری ته‌واو له‌سه‌رگرتنی هاوڕێیان بۆ هێناین که‌چۆن ته‌حقیقیان له‌گه‌ڵ کراوه‌..‌ کورێکی تریش تۆزێک بواری هه‌بوو بتوانێت مه‌علومات بهێنێته‌ ده‌ره‌وه که‌ناوی‌ "عه‌لی ئامه‌خان "بوو. له‌وێوه‌ زانیمان که‌ ده‌برێن بۆ به‌غداد
تابیعه‌ و رۆنیۆکه‌ چی به‌سه‌رهات !؟
رۆنیوۆ تابیعه‌که‌ ماوه‌یه‌کی پێجوو "ره‌سوڵ ی قاچاخچی " جوابی بۆناردم گوتی وه‌ره‌ ئه‌وئاگره‌ لابه‌ له‌ماڵم. له‌وسه‌رده‌مه‌دا تابیعه ‌و رۆنیۆ شاردنه‌وه‌ زۆر کارێکی مه‌ترسی دار بووه‌ ئه‌گه‌ر له‌هه‌ر ماڵێک بگیرایه‌ تیاده‌چوو منیش جوابم نارد بۆسه‌ره‌وه چی لێ بکه‌ین؟ جوابیان دامه‌وه‌ وتیان له‌گه‌ڵ براده‌رێکدا بچن به‌ئۆتۆمبیله‌که‌ی "شازادسائیب" بهێنن به‌ئۆتۆمبیله‌که‌ی کاک شازاد گواستمانه‌وه‌ بۆ ماڵی "کاکه‌ مه‌م بۆتانی" تابیعه‌و رۆنیۆکه‌ ئه‌وه‌ بۆ مێژوو من هه‌تا ئێره‌ ئاگام لێیه‌تی ، به‌داخه‌وه‌ له‌زۆر جاوپێکه‌وتنی خه‌ڵکدا ئه‌و تابیعه‌و ورۆنیۆیه‌ ئه‌سڵه‌که‌یان شێواندووه‌ ئه‌مه‌ ئه‌سڵه‌که‌یه‌تی ئه‌وه‌ش له‌رێگه‌ی منه‌وه‌ هێنراوه‌ منیش له‌ڕیگه‌ی ره‌سوڵی قاچاخچی یه‌وه‌ پاراستومه‌ من تا گه‌یشتنی بۆ ماڵی " مه‌م بۆتانی" ئاگادارم ئیتر دوای ئه‌وه‌ چۆن براوته‌ ده‌ره‌وه‌ لێی بێخه‌به‌رم ته‌نانه‌ت له‌یه‌ک دوو چاوپیکه‌وتندا به‌شێوه‌که‌ی تر مه‌لا به‌ختیار باسی ده‌کات به‌ڵام وانییه‌، ئه‌و رۆنیۆ وتابیعه‌یه‌ به‌وشێوه‌یه‌ گه‌یشتۆته‌وه‌سلێمانی .
وه‌ک له‌سه‌ره‌وه‌ باسمکرد که‌ وه‌زعمان زۆر خراپبوو، "سه‌لاح ره‌شید" که‌ ئه‌وکات خوێندنی ئاماده‌یی ته‌واوکردبوو به‌ته‌مابوو بچێت بۆ ده‌ره‌وه‌ی وڵات‌، پێمگوت که‌ نامه‌یه‌ک ده‌نووسم بۆ سوریا چونکه‌ کاک نه‌وشیروان له‌ نه‌مساوه‌ گه‌راوه‌ته‌وه‌ بۆ ئه‌وێ. هه‌م ده‌توانێت شتێکت بۆ بکات و هه‌م ئه‌م نامه‌یه‌شی پێبگه‌یه‌نه‌. له‌ وه‌ڵامدا وتی : ( ببوره‌ من ناتوانم شتی وابکه‌م).

هه‌ڵهاتن بۆ سوریا
له‌پاش ئه‌وگرتنانه‌ بریارم دا برۆمه‌ ده‌ره‌وه.‌ په‌یوه‌ندیم کرد به‌براده‌رانی به‌غداد ، کاک فاخیر هه‌مووشته‌کانی رێکخست ، به‌رله‌رۆیشتنیشم ئه‌بوشه‌هابم بینی له‌به‌غداد راسپارده‌یه‌کی دامێ بیده‌مه‌ مام جه‌لال
ئه‌بوو شه‌هابه‌ ( ئیحسان) لێیپرسیم وه‌زعی شار چۆنه‌ و کێت دیوه‌ کێت نه‌دیوه؟‌ پێم گوت کاک سالارم دواجاردیوه‌. وه‌زعی شار خراپه‌. وتی راسپارده‌یه‌کت ده‌ده‌مێ بیده‌ره‌مام جه‌لال وابزانم مام جه‌لال هه‌ر له‌سه‌ر ئه‌و راسپارده‌یه‌ی هه‌رئیستاش له‌گه‌ڵێدا خراپه‌ و به‌ینی باش نییه‌. دوا شه‌و که‌ به‌غدام به‌جێ هێشت له‌ گه‌ڵ کاک فاخیر چووم بۆ ویستگه‌ی شه‌مه‌نده‌فه‌ر، پێی گوتم که‌گه‌یشتیته‌ سوریا به‌رقییه‌ بکه.
‌که‌ گه‌یشتمه‌ قامشلی ته‌له‌فونی مام جه‌لال پێ بوو ته‌له‌فونی براده‌رانی قامشلیم پێنه‌بوو، نه‌شمده‌زانی له‌کوێن. ئه‌وشه‌وه‌ له‌ئوتێل مامه‌وه‌ دواتر هاتمه‌ شام. به‌رله‌ هه‌مووشتێک ده‌مویست ئوتێلێک بدۆزمه‌وه‌ له‌وساحه‌ی مه‌رجانه‌یه،‌ به‌سه‌دان ئوتێلی لێ بوو که‌س جێگای نه‌ده‌کردمه‌وه‌ دواجار له‌ ‌ئوتێلێک گوتم ‌جێم ناکه‌یت باته‌له‌فونێک بکه‌م گوتی باشه‌ ته‌له‌فونم کرد بۆ مام جه‌لال. هێرۆخان جوابی دامه‌وه‌ گوتی فه‌رموو گوتم مام له‌وێیه‌ گوتی به‌ڵێ جه‌نابت کێت گوتم پێی بڵێ "سه‌لامی خه‌یات" هاتوه‌ له‌سلیمانی یه‌وه‌ مام جه‌لال هاته‌سه‌رته‌له‌فوون له‌پاش چاک وچۆنی گوتی له‌کوێ دابه‌زیویت گوتم له‌هیچ شوێنێک جێگه‌م ناکه‌نه‌وه‌ به‌زمانی کۆی خۆی گوتی برۆ له‌وپلکه‌ی ئوتێلێکی زۆر راقی لێیه‌ ئیستا ده‌نێرم به‌دواتا وتی برۆ ئوتێڵێک په‌یدای بکه‌ بۆ سه‌عاتیکیش بێت ئیستا من زه‌لامێک ده‌نێرم به‌شوێنتا
هێنده‌ی نه‌برد براده‌رێک هات به‌شوێنما. ماڵێک هه‌بوو له‌وێ دانرابوو بۆ ئه‌وکه‌سانه‌ی که‌ دێن بۆ لای مام جه‌لال له‌وماڵه‌ داده‌به‌زێنران پاش دوورژ سه‌یاره‌یه‌کی موخابه‌رات هات به‌دوامدا سێ که‌سی تێدا بوو دانیشتم بردمیانه‌ کۆڵانێک پاش که‌مێک سه‌یاره‌یه‌کی تر هات مام جه‌لال بوو دووکه‌سی له‌گه‌ڵدا دیتنه‌که‌م بۆ مام جه‌لال به‌نهێنی زۆر نهێنی بوو هه‌ر له‌وێ ئه‌وراسپارده‌یه‌ی به‌غدام پێ گوت که‌ ئه‌بووشه‌هاب دایمێ
راسپارده‌که‌ی ئه‌بووشه‌هاب
که‌راسپارده‌که‌م پێگوت رووی تێکچوو. وتی وه‌زع چۆنه‌ وتم هه‌تا بڵێت وه‌زع خراپه‌ خاڵه‌شه‌هاب وئه‌وان ته‌سلیم کراونه‌ته‌وه‌ له‌ئێرانه‌وه‌ وتیشم براده‌رانی ناوه‌وه‌ ده‌ڵێن ( ئه‌گه‌ر مام جه‌لال ‌ چاره‌سه‌رێک بۆ ئه‌و وه‌زعه‌ نه‌کات شه‌قه‌که‌ له‌پێش هه‌موومان خۆی ده‌یخوات ) مام جه‌لال زۆری پێناخۆش بوو وتی ئه‌گه‌ر ئێوه‌ له‌دوای ئاشبه‌تاڵ چاوه‌روانتان بکردایه‌، من هێروم ده‌نارد له‌ رێگای تارانه‌وه‌ په‌یوه‌ندیتان پێوه‌بکات. ئێوه‌ په‌له‌تانکردوه‌.
ئیستا تۆ ده‌نێرمه‌وه‌ ماڵێک ده‌بێت تۆ بگه‌رێته‌وه‌ بۆ سلێمانی هه‌ندیك شت هه‌یه‌ پێت ده‌ڵێم وبگه‌رێره‌ماڵه‌وه‌. که‌ من سواری ئۆتۆمبیله‌که‌ ده‌بم بۆ بردنه‌وه‌ بۆ شوێنی خۆم که‌سێک من و مام جه‌لال ده‌بینێ، که‌مام جه‌لال ده‌یه‌وێت سواری ئۆتۆمبیل بێت براده‌که‌ به‌ره‌ورووی دێت ئه‌ڵێ مام جه‌لال ئه‌وه‌کێ بوو؟ مام جه‌لالیش پێ ده‌ڵێت ئه‌وه‌ کوڕیکه‌ به‌دوای کاسبی داده‌گه‌رێت ئه‌یه‌ویت من یارمه‌تی بده‌م. ئه‌ویش ده‌ڵێت بزنزی چی؟ ئه‌وه‌ سه‌لامی خه‌یاته‌، سه‌ری خۆتی ته‌سلیم بکه‌ لێی مه‌ترسه‌ زۆر ده‌یناسم. من و ئه‌و هێشتا یه‌کمان نه‌یدبوو.‌ که‌من گه‌رامه‌وه‌ پاش دوو رۆژ مام جه‌لال هات بۆلام وتی پێویست ناکات زیاتر به‌نهێنی بمێنیته‌وه‌ له‌به‌رئه‌وه‌ی" سڵه‌ی قه‌ساب" بینیونی وتی ئیتر وه‌ره‌ بۆ ده‌ره‌وه‌ بۆ ته‌جه‌موع : ته‌جه‌موع کۆمه‌ڵێک رێکخراوی معاره‌زه‌ی عێراقی بوون له‌ وێ کۆده‌بونه‌وه‌ .
سه‌لامی خه‌یات له‌گه‌ڵ مام جه‌لال دا
له‌کۆبونه‌وه‌یه‌کی کۆمه‌ڵه‌دا که‌ ( مام جه‌لال ـ نه‌وشیروان مسته‌فا ـ ئیبراهیم عه‌زۆ ـ فازیلی حاجی ته‌یب و فه‌رهاد شاکه‌لی و من) بووین پێشنیازکرا گوتیان هه‌موو چوارده‌وری مام جه‌لال عه‌ره‌بن پێمان باشه‌ یه‌کێک له‌خۆمانی له‌گه‌ڵدابێت و ئاگای له‌وه‌زعه‌کان بێت گوتیان تۆمان هه‌ڵبژاردووه‌ که‌له‌گه‌ڵیدابیت منیش گوتم ئه‌گه‌ر بریاری رێکخستن وکۆمه‌ڵه‌ بێت قبوڵمه‌ ، له‌پاش ئه‌وبریاره‌ من ماوه‌یک له‌ماڵی خۆمه‌وه‌ ده‌هاتم بۆلای مام جه‌لال ، جاریش هه‌بوو مام جه‌لال به‌بێ من ده‌رده‌چوو چونکه‌ ماڵه‌که‌ی من له ‌شام ته‌له‌فونی نه‌بوو دواتر مام جه‌لال رۆژێک پێی گوتم که‌به‌یه‌کجاری له‌ماڵه‌وه‌ له‌گه‌ڵیدا بم بۆ ئاسانکاری زیاتر له‌کاره‌کاندا ئیدی به‌وشێوه‌یه‌ چومه ‌لای مام جه‌لال. وپه‌یوه‌ندی گرتن به‌ ناوه‌وه‌ له‌رێگای منه‌وه‌بوو. ته‌نانه‌ت ئه‌وخه‌ڵکه‌ی که‌ له‌کوردستانه‌وه‌ ده‌هات مام جه‌لال به‌منی راده‌سپارد ده‌یگوت سه‌لام بچۆ بیبینه‌ له‌فڵان شوێنه‌ ته‌حقیقێکی باشی له‌گه‌ڵ بکه‌ بزانه‌ ده‌شیت بیبینم یان نا به‌م شێوه‌یه‌ به‌رۆژ له‌هاتوچۆ وخه‌ڵک بینیندابووین شه‌وانه‌ش زۆربه‌ی کات له‌باسی ئه‌وه‌دابووین دکه‌په‌یوه‌ندی به‌کێ بکه‌ین وکێ پێ نه‌کرێت ...

له‌پێکه‌وه‌کارکردن له‌گه‌ڵ مام جه‌لالدا هه‌میشه‌ ناکۆک وناته‌با

زۆربه‌ی کات ناکۆک وناته‌بابووین مام جه‌لال له‌مامه‌ڵه‌کردن له‌گه‌ڵ ماڵی مه‌لامسته‌فا ودروستکردنی یه‌کێتی ته‌شبیهێکی هه‌بوو ده‌یگوت : ( ماڵی مه‌لامسته‌فا به‌نداوێکن به‌خشت دروستکراوه‌ ئه‌ودیو به‌نداوه‌که‌ ئاوه‌ من دێم یه‌ک یه‌ک ئه‌وخشتانه‌ی لێ ده‌رده‌هێنم بۆ ئه‌وه‌ی ئه‌و ئاوه‌ په‌نگخواردوه‌ی نه‌مینێت وهه‌ره‌سیان پێ بێنم ) . منیش ده‌مگوت مام جه‌لال تۆ خشته‌کان ده‌رده‌هێنیت کارێکی باشه‌ به‌ڵام خشته‌کان له‌مدیو هه‌ڵیان مه‌چنه‌ مه‌یانخه‌ره‌وه‌ سه‌ریه‌ک ، بیانخه‌یته‌وه ‌سه‌ریه‌ک هه‌روه‌کوئه‌وه‌ی لێدێته‌وه‌ من له‌وباره‌یه‌وه‌ گفتوگۆیه‌کی زۆرم له‌گه‌ڵ مام جه‌لال کرد له‌سه‌ر ئه‌وه‌ی که‌ دکتۆر مه‌حمود بۆ ناومان بانگنه‌کرێت، بۆم شیده‌کرده‌وه‌ که‌ چۆن ئه‌و ده‌موچاوانه‌ی پارتی ،ئه‌گه‌ر مام جه‌لال ده‌ستیان نه‌گریت، نه‌یانبه‌ینه‌وه‌ بۆ کوردستان له‌گه‌ڵ خۆماندا ئه‌وانه‌ ئاشبه‌تاڵییان کردووه‌، خه‌ڵک راویان ده‌نێن ، خۆشه‌ویست نین لای خه‌ڵک تۆ بۆ، ده‌چیت به‌دوایاندا ئه‌وانه‌ کۆمه‌ڵێک پاره‌یان که‌وتۆته‌ به‌رده‌ست ، بابرۆن کاسبی خۆیانی پێوه‌بکه‌ن .
مام جه‌لال له‌وه‌ڵامی ئه‌مه‌دا به‌منی ده‌گوت ( تۆنیازت هه‌یه‌ به‌خه‌ڵکی سه‌رجاده ‌شۆرش به‌من بکه‌یته‌وه‌) .
مام جه‌لال بیری بۆ عومه‌ر ده‌بابه ‌،بۆ عه‌لی عه‌سکه‌ری ده‌چوو، مناقه‌شه‌یه‌کی زۆر گه‌وره‌مان له‌سه‌ر جۆرج حه‌به‌ش بوو، پێمگوت:"جۆرج حه‌به‌ش"( ئه‌رز وخۆڵه‌که‌ی حاجی عۆمه‌رانی به‌رزکردۆته‌وه‌و و به‌سوپای ئێراقی گوتوه‌ : ئافه‌رین ئه‌رزی عروبه‌تان رزگارکردووه‌.). مام جه‌لال ئه‌گه‌ر ره‌فیق حه‌کیم (واته‌ جۆرج حه‌به‌ش) وایکردبێت شتێکی باشی نه‌کردووه‌. ئه‌م جۆره‌ بیرکردنه‌وه‌یه‌ به‌بروای من
له‌سه‌ریه‌کیتی نیشتیمانی به‌خراپ شکایه‌وه‌ نه‌ک به‌ته‌نها له‌سه‌ریه‌کێتی نیشتیمانی بگره‌ له‌سه‌ر ئه‌وخه‌ڵکه ‌هه‌ژارو تیکۆشه‌ره‌ش که‌ باجی ئه‌و بیرکردنه‌وه‌ خراپه‌ی ده‌دا. من له‌دژی بانگردنه‌وه‌ی ره‌سوڵ مه‌مه‌ند بووم بۆ ریزه‌کانی یه‌کێتی هه‌میشه‌ ناکۆک بووین له‌هه‌مووکۆبونه‌وه‌یه‌کیشدا که‌ ده‌راگاکان داده‌خران به‌روی دیالۆگ و ده‌بووه‌ ده‌مه‌قاڵه‌مان پێی ده‌گوتم سه‌لام :( به‌قه‌ده‌ر من کتێبت خوێندۆته‌وه‌ ، به‌قه‌ده‌ر من سیاسه‌تت کردوه‌، به‌قه‌ده‌رمن خه‌ڵک ده‌ناسی) ده‌مگوت نه‌خێر ، به‌ڵام منیش بۆچونی خۆمم هه‌یه‌ په‌یوه‌ندیکردن به‌خه‌ڵک ‌چ په‌یوه‌ندیه‌کی هه‌یه‌ به‌زۆر خوێندن و زۆر ناسینی خه‌ڵک من ئه‌موسیت واقیعی بیرکردنه‌وه‌ی خه‌ڵکی کوردستانی پێبگه‌ێنم ئه‌ونه‌ده‌چووه‌ ژێر باری پێم ده‌گوت ( تۆ چه‌ند ساڵه‌ له‌واقیعی کوردستان دابراویت زۆرئاگات لێی نییه‌ ئێمه‌ له‌و ‌واقیعه‌وه ‌هاتوین ئێمه‌ ئه‌زانین چی له‌کوردستان ده‌گوزه‌ریت ، پاشان ئێمه‌ خه‌ڵکی باشمان دروستکردووه‌)

هاتوچۆی نامه‌کان
نامه‌کان من ده‌منارد به‌هۆی ده‌رمانی ریشتاشین و مه‌عجونی دان، ژێره‌که‌یمان ده‌کرده‌وه‌ ده‌مانخسته‌ ژێری به‌وخه‌لکه‌ نامه‌کانمان ده‌ناردوه‌

خۆراگه‌یاندنه‌که‌‌ بۆچی به‌ناوی یه‌کێتی نیشتیمانی بوو نه‌ک به‌ناوی کۆمه‌ڵه‌ !؟
بۆ مێژوو ده‌یڵێم : مام جه‌لال له‌راگه‌یاندنی یه‌کێتی نیشتیمانی کوردستان، نه‌ک کۆمه‌ڵه،‌ باشی پێکاوه‌ . مام جه‌لال بۆچونێکی هه‌بوو له‌وسه‌رده‌مه‌دا، ده‌یویست نیمچه‌به‌ره‌یه‌ک دروستبکات‌، مام جه‌لال کۆمه‌ڵێک رێکخراوی له‌ناویه‌کیتی دروستکرد چونکه‌ ئه‌گه‌ر به‌تاقی ته‌نها کۆمه‌ڵه‌ ئیعلان بکرایه‌ ره‌نگه‌ خه‌ڵک لێی بسڵه‌میاته‌وه‌ ، له‌ ناوی کۆمه‌ڵه‌ ، یان حیزبێکی تابیه‌ت به‌مامجه‌لال . مام جه‌لال له‌وه‌ده‌ترسا که‌هه‌موولایه‌ک ئه‌ویان به‌براگه‌وره‌ قبووڵنه‌بێت.
ره‌نگه‌ به‌نیسبه‌ت ناوخۆو ده‌ره‌کی ئه‌گه‌ر به‌ناوی کۆمه‌ڵه‌دابه‌زینایه‌ شکستمان ده‌خوارد، چونکه‌ به‌راستی خه‌ڵک ‌ناو هێنانی کۆمه‌ڵه‌ی پێ هه‌زم نه‌ده‌کرا زوربه‌ی زۆری دانیشتوانی کوردستان نه‌خوینده‌وار بوون، زۆربه‌ی زۆریشیان حه‌ساسیه‌تێکی هه‌بوو به‌ناوی کۆمه‌ڵه‌، به‌مارکس به‌لینین ، ره‌نگه‌ زۆر زه‌ق بوایه‌ ئه‌گه‌ر به‌ناوی کۆمه‌ڵه‌ی مارکسی لینین دابه‌زینایه‌ .
سه‌رچاوه‌ی سامانی یه‌کێتی له‌و کاته‌دا !!؟؟
من ئاگاداری ئه‌وه‌ نیم. به‌ڵام له‌ هه‌موو ئه‌و ماوه‌یه‌ی که‌ من سه‌رپه‌رشتیم ده‌کرد یه‌ک جار پاره‌م ناردۆته‌وه بۆ کوردستان‌. مام جه‌لال ئاگاداری سامانی یه‌کێتی بوو.
مامجه‌لال له‌کوێی بوو !؟
مام جه‌لال له‌ سوریابوو، هاتوچۆی لیبیا و میسری ده‌کرد. ئیدی من نازانم ئه‌گه‌ر ئه‌و له‌و وڵاتانه‌ یارمه‌تی وه‌رگرتبێت.
پاره‌تان چۆن ده‌نارده‌وه‌ !؟
هه‌ندێک که‌س هاموشۆی ئه‌وروپایان ده‌کرد بۆ کرینی کارگه‌ و شتومه‌کی بازرگانی، ئه‌وان پاره‌یان ده‌دا به‌ رێکخستن له‌ کوردستان، که‌ ده‌هاتنه‌ سوریا نهێنییه‌کیان به‌من ده‌گوت، منیش به‌ مام جه‌لام ده‌گوت و ئه‌ویش پاره‌که‌ی ده‌دانه‌وه‌. بۆنموونه‌: جارێک شێخ فاتیحی گوڵانی پاره‌ی دابوو به‌ رێکخستن و منیش دامه‌وه‌. ئه‌وانه‌ی ئه‌م کاره‌یان ده‌کرد زۆر پاڵه‌وان و نه‌ترسبوون.
شه‌هید جه‌ماله‌ ره‌ش، شه‌هید مامۆستا عه‌زیز هاتن بۆ لامان هه‌روه‌ها حاجی عوسمانی سایه‌ق ناکرێت ناوی ئه‌وانه‌ له‌یاد بکه‌یه‌ن. نه‌ک ته‌نها پاره‌، بگره‌ نهێنیه‌کانیشیان ده‌گه‌یانده‌وه‌ کوردستان.
مام جه‌لال له‌پاراستنی ژیانی خۆیدا !؟
مام جه‌لال له‌مه‌سه‌له‌ی پاراستنی خۆی زۆر لێهاتوو وریایه‌ ‌،ته‌نانه‌ت له‌ حیمایه‌کانیشی وریاتر بوو شۆفێره‌که‌ی هه‌موو ئێواریه‌ک حسابی ده‌هێنا بۆ مام جه‌لال ، رۆژێکیان حسابی پێش دوورۆژی بۆ مام جه‌لال هێنابوو مام جه‌لال پێگوت ئه‌وه‌حسابی پێرێیه‌ ، نه‌ک هی ئه‌مرۆ ، له‌سه‌ر ئه‌وه‌ ده‌ریکرد. هه‌مووکاتیش که‌له‌سوریا هاتوچۆمانکردبیت هه‌ردووکمان ده‌مانچه‌مان پێبووه‌ به‌ڵام ده‌مانچه‌کانمان ده‌شارده‌وه‌ ، جاریش هه‌بووه‌ پێویستکات کلاشنیکۆف به‌رین. ئه‌و نه‌یده‌ویست ئێمه‌چه‌که‌کانمان ده‌رکه‌وێت. مام جه‌لال باوه‌رێکی لابوو که‌ خه‌ڵک فزوڵی یه‌ ره‌نگه‌ که‌زانی چه‌کت پێێه‌ حه‌زبکات بزانێت تۆ کێت و‌بۆچی چه‌کداریت!؟ . له‌وێشه‌وه‌ خه‌ڵک ده‌که‌وێته‌ ته‌عقیبکردنت . که‌زانیشی کێین ، کوشتنیشت ئاسانه‌ .
ـ یه‌که‌م به‌یانی که‌ چوومه‌‌ماڵی مام جه‌لال ، له‌گه‌ڵ مام جه‌لالدا ده‌رچونێکمان هه‌بوو، که‌مام جه‌لال هاته‌ خواره‌وه‌ ، ویستی‌ بچێته‌ پێشه‌وه‌ی سه‌یاره‌که‌‌ من رێم لێگرت وتم مه‌چۆره ‌پێشێ ، تۆ بچۆره‌ پشتی سایه‌قه‌که‌ دابنیشه‌ ، مام جه‌لال وتی ئه‌مه‌ تازه‌یه‌ سه‌لام بۆ نه‌چمه‌ پێشێ !؟ ، وتم تۆسه‌رکه‌وه‌ له‌رێگادا بۆت باس ده‌که‌م که‌سوار بووین ئه‌وم له‌پشتی سایه‌قه‌که‌ دانا وتی بۆچی منت هێنایه‌ ئێره‌ ، وتم سه‌لامه‌ترین شوێن له‌ناو سه‌یاره‌دا ئه‌و شوێنه‌یه‌ که‌ئیستا تۆتێدا دانیشتویت له‌ دووحاڵه‌تدا له‌حاڵه‌تی تقه‌لێکردن وله‌حاڵتی وه‌رگه‌ران ، که‌ بۆم شیکرده‌وه‌ چۆن قه‌ناعه‌تی کرد له‌وه‌به‌دواوه‌ که‌ده‌رۆیشتین مام جه‌لال له‌پشتی شۆفێره‌که‌ داده‌نیشت
ـ زۆرجاریش هه‌بووه‌ ته‌کسیمان ده‌گرت ئه‌چوین بۆ هه‌ندێک شوێن مام جه‌لال خه‌ڵکی به‌نهێنی ده‌بینی.
له‌کوێ و کێی ده‌بینی !؟
وه‌ک ناو ناتوانم ناوه‌کانتان پێبڵێم کێی ده‌بینی ، هه‌ندێکی ئه‌وخه‌ڵکه‌ پێش بینینی مام جه‌لال من ده‌مبینین ، ته‌واو لێیان ووردد ه‌بومه‌وه‌ ئینجا مام جه‌لال ده‌یبینین به‌ڵام بۆ شوێنی بینین زۆرجار چایخانه‌یه‌کی چه‌په‌کی کۆنی ده‌دۆزییه‌وه ، که‌دوربێت له‌چاوان ‌ده‌چوینه‌ ئه‌وێ له‌وێ خه‌ڵکه‌که‌ی ده‌بینی .

ژه‌هر خوارد ن !؟
ـ ناچمه‌ ته‌فاسیڵ به‌ڵام جارێکییان چوین بۆ قامشلی، له‌ رێگای چێشتخانه‌یه‌کی لێبوو مام جه‌لال ده‌ی‌زانی گۆشتی زۆر خۆش بوو ،له‌سوریا گۆشتی برژاو به‌کیلۆیه‌، مام جه‌لال داوای سێ کیلۆ گۆشتی کرد، ئێمه‌ پێنچ که‌س بووین ، خۆشتان ئه‌ازنن بۆنی دوکه‌ڵی ئه‌وشوێنانه‌ چۆنه‌ من هه‌رزوو هاتمه‌ ده‌ره‌وه‌ ، مام جه‌لال نه‌هاته ‌ده‌ره‌وه‌ هه‌تا هه‌موو گۆشته‌که‌ له‌ برژاندن ته‌واو نه‌بوو. پێی گوتم سه‌لام ده‌زانی بۆ نه‌هاتمه‌ ده‌ره‌وه‌؟ منیش گوتم به‌ڵێ له‌به‌ر ئه‌وه‌ی لێمان نه‌دزێت. مام جه‌لال گوتی نه‌، به‌ڵکو له‌به‌ر ئه‌وه‌ی نه‌کا شتێکمان بۆ پێوه‌بکات و بمانکوژێت.
زۆرێک له‌وانه‌ی که‌ له‌دوه‌ری مام جه‌لال نزیکایه‌تییه‌کی تایبه‌تیان هه‌بووه‌ وله‌سه‌ر یه‌ک سفره‌ ئاوخوێ به‌شکراوه‌ هێرۆ خان ناکۆک بووه‌ له‌گه‌ڵیاندا ، له‌گه‌ڵ سه‌لامدا هێرۆ چۆن بووه‌ ؟
ئه‌وکاته‌ی که‌ من له‌گه‌ڵ مام جه‌لال ده‌ژیام له‌ماڵه‌که‌دا من و مام جه‌لال وهێرۆ وهه‌ڵۆ و باڤێلیش هێشتا منداڵ بوو ، هه‌روه‌ها نه‌نکی هێرۆ خان سه‌لمه‌خان زۆربه‌ی کات له‌ماڵی مام بووه‌... هیچ کات ناکۆکی له‌نێوانی من وهیڕۆ خاندا رووی نه‌داوه‌ ، ته‌نانه‌ت زۆرجار له‌ژوره‌که‌ی مام جه‌لال که‌ من وئه‌و ده‌نگه‌ده‌نگمان بووه‌ له‌سه‌ر شته‌کان ، هێرۆ خان دواتر پێی گوتۆته‌وه‌ که‌ سه‌لام راستده‌کات ، ته‌نانه‌ت له‌ شه‌ری براکوژی که‌ده‌ستی پێکردووه‌ ، هێرۆخان له‌سه‌رکردایه‌تی به‌ مام جه‌لالی گوتوه‌ ئه‌ها قسه‌کانی سه‌لام چۆن ئیستا ده‌رده‌که‌ون .

تێکچوون له‌گه‌ڵ مام جه‌لال !؟
شه‌وێک له‌ماڵ دانیشتبووین بانگی کردم بۆ ژوره‌که‌ی خۆی گوتی سه‌لام ئه‌زانیت کێ وکێ چونه‌ته‌ده‌رێ !؟ گوتم نا !؟ گوتی ( عه‌لی عه‌سکه‌ری ، عومه‌رده‌بابه‌، دکتۆرخالید ) منیش بۆئه‌وه‌ی توره‌ی بکه‌م گوتم ئه‌زانم کێ ناردونیه‌ته‌ده‌رێ ، که‌وام گوت زۆری پێ ناخۆشبوو ، وتی خۆمم که‌ فڵانکه‌س هات نامه‌که‌م دایه‌ وتم سوعبه‌ت ده‌که‌م ، ئه‌زانم تۆ ناردوتنه‌ ‌ده‌رێ ..
ده‌ستمانکرد به‌قسه‌و پلانی گه‌رانه‌وه‌ بۆ کوردستان ، ‌ پاش که‌مێک 'عادل موراد' هات بۆلای مام جه‌لال من له‌ودیو له‌گه‌ڵ هه‌ڵۆ دانیشتبووم مام جه‌لال بانگی کردم وتی سه‌لام ئه‌ڵێن تۆ زۆرقسه‌ی ناره‌وا به "‌عه‌لی سنجاری" ده‌ڵێت منیش سه‌یرم لێهات که‌ئه‌وه‌ که‌ی باسبێت پێم گووت مام جه‌لال بۆ تۆ لات وایه‌ من پیاوێکی به‌دکارم جنێو قسه‌ی ناشیاو بکه‌م ، وتم" عه‌لی سنجاری" له‌هه‌ر شوێنێک داده‌نیشێت دووهه‌زارقسه‌ به‌مارکسیه‌ت به‌بیروباوه‌ره‌که‌ی من ده‌ڵێت منیش زۆر به‌خه‌ستی جوابی ده‌ده‌مه‌وه‌ ئه‌و چه‌ند به‌ناشرینی قسه‌بکات منیش به‌دووئه‌وه‌نده‌ ناشرین جواب ده‌ده‌مه‌وه‌ ، وتی ئاخر سه‌لام ئه‌وه‌نابێت ، گوتم جامن هه‌قی تۆم چییه‌ ، وتی ئاخر هه‌موو که‌س چۆن ئێمه‌ دۆست ونزیکی یه‌کترین ، هه‌رقسه‌یه‌ک تۆ بیکه‌یت ئه‌وان لایان وایه‌ من فێرت ده‌که‌م .وتم که‌ی ئه‌وه‌ باسه‌ ، ئه‌وهه‌رپێی له‌سه‌رداگرت ، وتم مام جه‌لال باوه‌ربکه‌ ناتوانم جوابی عه‌لی سنجاری ونمونه‌ی عه‌لی سنجاری نه‌ده‌مه‌وه‌ وتی بروا بکه‌ ئه‌گه‌ر هه‌روا به‌رده‌وام بیت له‌به‌یانیه‌وه‌ برایه‌تییه‌که‌مان نامنێنێت !؟
چاوه‌رێی ئه‌وه‌ی نه‌ده‌کرد که‌من ئه‌وجوابه‌ی بده‌مه‌وه‌ ، منیش سه‌رێکم برده‌پێشه‌وه‌ گوتم مامجه‌لال گوتی ئا ، وتم به‌یانی نائێستا.
هه‌ڵسام ، ده‌منچه‌یه‌کی چوارده‌خۆرم له‌قه‌د بوو ده‌مانچه‌که‌م هه‌ڵدایه‌ سه‌رجێگه‌ی دانیشتنه‌که‌م ، هه‌ویه‌ی حه‌ملی سیلاحیشم هه‌ڵدایه‌ بۆ به‌رده‌می مامجه‌لال ، له‌رۆیشتندا چاوم لێ بوو مام جه‌لال به‌دان نه‌وی ببو بۆ ئه‌وه‌ی هه‌ویه‌ که‌بسه‌که‌ ئاوا ده‌یویست له‌تی بکات پاش چه‌ندرۆژێکی پێچوو مام جه‌لال ناردی به‌دواما عه‌ره‌به‌کان وایان ده‌زانی مام جه‌لال مامه‌ ، سایه‌قه‌که‌ هات وتی "عه‌مت " بانگت ده‌کات که‌چووم نه‌وشیروان دانیشتبوو ، هاودۆستێکی مامجه‌لال که‌ هه‌ر له‌به‌کره‌جۆ له‌گه‌ڵیدا بووه‌ ، کاک ئیسماعیلی سازمانی ئینقیلابی له‌وێ بوو مام جه‌لال ویستی ئاشتم بکاته‌وه‌ گوتی ئه‌وکارێک بوه‌ هیچ نه‌بووه‌ به‌ینی من وتۆ له‌وه‌گوه‌ره‌تره‌ له‌سه‌رشتی واتێکبچین . وتم مامجه‌لال بڕیارێکه‌و داومه‌ هه‌تاماوم حیزبایه‌تی ناکه‌م نمونه‌یه‌کیشم بۆ هێنایه‌وه‌ وتم به‌بیرته‌ نه‌وشیروانی فوئاد مه‌ستی له‌ شه‌سته‌کاندا له‌سه‌رشتێکی بچوک رێکخراوه‌که‌ی به‌جێ هێشت وتی باحیزبه‌که‌مان حیزبی "حه‌مه‌ی سارۆ و مینه‌ی سمێل " بیت منیش ده‌ڵێم بایه‌کێتی نیشتیمانی یه‌کێتی "عه‌لی سینجاری" بێت . له‌هه‌مانکاتیشدا ئه‌چم دووزمان فێرده‌بم که‌دووزمانه‌که‌ فیربووم ئینجا دێم سیاسه‌ت ده‌که‌م نه‌وشیروان مسته‌فا هه‌ڵیدایه‌و گوتی جاخۆ عه‌لی سنجاری زمان نازانێت ، وتم ئا به‌ڵام عه‌لی سینجاری پاره‌ی هه‌یه‌ بۆیه‌ ئێوه‌ رێزی لێده‌گرن ، ئیتر رازی نه‌بووم. بگه‌رێمه‌وه‌

به‌درێژای ئه‌م سی ساڵه‌ مام جه‌لال په‌یوه‌ندی پێکردویته‌وه‌ !؟
له‌پاش ئه‌وه‌ی هه‌موو شتێکمان براندبوه‌وه‌ هه‌ر له‌شام رۆژێک ناردیه‌وه‌ به‌دواما وتی سه‌لمه‌ خان خواردنێکی خۆشی کردووه‌ ، حه‌زده‌که‌م بێت ، که‌چووم مام جه‌لال پێی گوتم سه‌لام وه‌ره‌ برۆینه‌وه‌ ته‌نانه‌ت ئه‌وکاته‌ هێرۆ به‌ قوباد سکی پڕ بوو گوتی هێرۆ ده‌چێت بۆ به‌یروت منداڵه‌که‌ی ده‌بێت پاشان ئه‌ویش دێت من وتۆ ودکتۆر هاشم ده‌چینه‌ ئه‌نقه‌ره‌ براده‌رانی تریش به‌دوامانه‌وه‌ دێن ، له‌که‌له‌ی شه‌یتان وه‌ره‌خواره‌وه‌ و وه‌ره‌ بابچینه‌وه‌ .
وتم مام جه‌لال بروابکه‌ من ناگه‌رێمه‌وه‌ هیوادارم سه‌رکه‌وتوبیت له‌کاره‌کانتدا من جارێکی تر سیاسه‌ت ناکه‌م
له‌ساڵی 1988 مام جه‌لال هات بۆ ‌ستۆکهۆڵم ته‌له‌فونیاینکرد وتیان مام جه‌لال هاتوه‌ حه‌زده‌کات ئه‌وبراده‌رانه‌ ببینێت تۆش یه‌کێکیت له‌وان، منیش چووم بۆ بینینی ئه‌وسه‌رده‌مه‌ سه‌رده‌می کیمایاوی هه‌ڵه‌بجه‌ بوو وه‌زعی کوردی زۆر خراپ بوو له‌ 1991 یشدا نامه‌یه‌کی بۆنوسیم که ‌بگه‌رێمه‌وه‌ من نه‌گه‌رامه‌وه‌ . چونکه‌ ده‌مزانی له‌گه‌ڵ مامجه‌لال تێکده‌چمه‌وه‌ ، چونکه‌ مام جه‌لال له‌وکه‌سانه‌یه‌ که‌ گوێت لێده‌گرێت ، به‌ڵام که‌م جار هه‌یه‌ به‌قسه‌ت بکات.

په‌یوه‌ندی له‌گه‌ڵ نه‌وشیروان مسته‌فادا ؟! پاش ئه‌وه‌ی له‌شام من چوومه‌ لای مام جه‌لال وزۆربه‌ی کاره‌کانمان پێکه‌وه ‌راده‌په‌راند رۆژێکیان من و نه‌وشیروان له‌گه‌ڵ فازیلی حاجی ته‌یبدا له‌چایخانه‌یک سێ قۆڵی دانیشتبووین کاک نه‌وشیروان گوتی: سه‌لام به‌ڕاستی تۆ و ما جه‌لال هه‌موو ئیشه‌کانتان خستۆته‌ ژێر رکێفی خۆتان و ناهێڵن که‌س ئیش بکات تۆ جه‌لالیت ، من جوابی خۆمم دایه‌وه‌ که‌ من چۆن جه‌لالی نیم ، جاکێشه‌که‌ له‌وه‌دایه‌ ، من نه‌ک هه‌ر کاک نه‌وشیروان من به‌جه‌لالی ده‌زانێت زۆر خه‌ڵکی تریش لای وابووه‌ سه‌لامی خه‌یات کۆمه‌ڵه‌ نییه‌ جه‌لالییه‌.
ماوه‌یه‌کیش له‌شام من و کاک نه‌وشیروان مسته‌فا له‌ ماڵێک ده‌ژییاین، ئه‌وکاتانه‌ی که‌پێکه‌وه‌ بووین هه‌میشه‌ له‌گفتوگۆدابووین که‌ چۆن ئیش بکه‌ین ، ئه‌م جاره‌چۆن برۆینه‌وه‌ ناوکوردستان وجه‌ماوه‌ر له‌گفتوگۆکانماندامن رام وابوو که‌ده‌بیت خۆمان خۆشه‌ویست بکه‌ین ، ده‌بێت زیاتر ئه‌و هه‌ستی نه‌ته‌وایه‌تییه‌ی که‌کزبووه‌ لای خه‌ڵک هێزی بده‌ینێ ،له‌وه‌دا من ونه‌وشیروان بوو به‌‌ده‌نه‌ده‌نگمان ، ئه‌و‌انه‌ واپه‌روه‌رده ‌ببوون که‌سیان له‌خۆیان به‌لێهاتووتر نه‌ده‌زانی ، که‌زۆریشیان بۆده‌هات له‌باسه‌که‌ ده‌چوونه ‌ده‌ره‌وه‌ نه‌وشیروان له‌وگفتوگۆیانه‌‌دا جاریکیان زۆر توره‌بوو پێی گوتم ( تۆ براکه‌ت هه‌موو مه‌تبه‌عه‌که‌ی ئێمه‌ی دا به‌پارتی ) له‌سه‌رئه‌وباسه‌ عادزی که‌وته‌نێوانمان دواتر مامجه‌لال بیستیه‌وه‌ ، زۆری پێناخۆشبوو ویستی بکه‌وێته‌ به‌ینامنه‌وه‌ ، ته‌نانه‌ت بۆشاهێدی مێژوو مام جه‌لال کاک ئیسماعیلی هێنابووله‌گه‌ڵ خۆی بۆ ئاشتکردنه‌وه‌ی من و نه‌وشیروان که‌ده‌ستکرا به‌قسه‌ ، من به‌توره‌ییه‌وه‌ قسه‌م کرد وتم نه‌وشیروان هه‌موو باسه‌کانی وه‌لا ناوه‌ ، ئه‌گه‌ر باشتری پێیه‌ باسی بکات ده‌ڵێت چاپخانه‌که‌مان براکه‌ت له‌ترسا ته‌سلیمی پارتی کردووه‌، مام جه‌لال وا جوابی دایه‌وه‌ گوتی (نه‌وشیروان، سه‌لام راست ده‌کات تۆ باسی برای سه‌لام بۆ ده‌که‌یت : من چی بکه‌م شێخ جه‌نگی برام جاشه‌ خه‌تای من چییه)!؟‌
له‌ساڵی 1996 دا پێش ئه‌وه‌ی 31 ئاب رووبدات براده‌رێکی مه‌کته‌بی سیاسی له‌ کوردستانه‌و ته‌له‌فونی بۆکردم قسه‌م له‌گه‌ڵ کرد وتم ئاگاتان له‌وه‌زعی هه‌ولێرتانه‌ ئه‌وبه‌ڕێزه‌ زۆر به‌متمانه‌وه‌ وتی زۆر باشه‌ . دووهه‌فته‌ی نه‌برد له‌پاش ئه‌و پێکه‌وه‌ قسه‌کردنه‌ی من ئه‌و به‌رێزه‌ی مه‌کته‌بی سیاسی هه‌ولێر گیرا ، له‌ 31 ی ئابدا من ته‌له‌فونم کرد بۆ نه‌وشیروان مسته‌فا، ئه‌و ‌ له‌له‌نده‌ن بوو. وتم ده‌بینیت وه‌زعه‌کان چی لێ هاتوه‌!؟ ، وتی ئا ده‌یبینم ، گوتم وره‌ بابرۆینه‌وه‌ گوتی نایه‌م ، گوتم ئه‌زانیت وه‌زعی ئه‌وخه‌ڵکه‌ چۆنه‌ ... هه‌رنه‌چوه‌ژێری ، دوباره‌ گوتی نایه‌مه‌وه‌ ، من هه‌رزۆرم لێکرد دواتر نه‌وشیروان گه‌یشته‌ تینی گوتی:(سه‌لام که‌س به‌قه‌ده‌ر تۆ مام جه‌لال ناناسێت ، ئیش له‌گه‌ڵ مام جه‌لال ناکرێت )

مام جه‌لال وه‌فای بۆ که‌س نییه‌ !؟
مام جه‌لال وه‌فای بۆکه‌س نییه‌ ‌: من ومام جه‌لال له‌سه‌ر سنوری ئێراق سوریا بوین به‌نیاز بووین باره‌گا له‌سه‌رسنور بکه‌ینه‌وه‌ ، تازه‌ش مه‌فره‌زه‌یه‌کمان ناردبووه‌ کوردستان ئێواره‌ گه‌راینه‌وه‌ بۆ ناو قامشلی پیاسه‌مان ده‌کرد عه‌بدولره‌زاق فه‌یلی هه‌واڵی گرتنی ( کاک جه‌بار ) واته‌ "ئیبراهیم عه‌زۆ" له‌لایه‌ن قیاده‌ موئه‌قه‌ته‌وه‌ پێراگه‌یاندین قیاده‌ی موئه‌قه‌ته‌ ئیبراهیم عه‌زۆ که‌سه‌رپه‌رشتی مه‌فره‌زه‌که‌ی ده‌کرد، به‌خۆی وچل ودوو که‌سی مه‌فره‌زه‌که‌ گرتبوونی . له‌وێ ده‌ستبه‌جێ وتم مام جه‌لال جارێ قیاده‌موئه‌قه‌ته‌ هێنده‌ هێزدارنییه‌ من دوو مه‌فره‌زه ‌ده‌به‌م ئه‌چم بزانم شتێکیان بۆناکه‌م له‌ده‌ستی قیاده‌ موئه‌قه‌ته‌ رزگاریان بکه‌م ، مام جه‌لال وتی( سه‌لام هه‌ڵه‌ به‌هه‌ڵه‌ چاک ناکه‌یت !؟، به‌گۆری هه‌رچی شه‌هیدی کوردستان براهیم عه‌زۆ بکوژن، له‌ ماڵی مه‌لامسته‌فا به‌ئیدریس ومه‌سعو‌د نه‌بێت به‌هیچی تر لێیان خۆشنابم ، ئه‌بێت هه‌ردووکیان بکوژرینه‌وه)‌ ... سامی عه‌بدولره‌حمان، ئیبراهیم عه‌زۆوو هه‌ر چل و دوو که‌سه‌که‌یا‌نی شه‌هید کرد ، که‌چی دوایی مام جه‌لال له‌گه‌ڵیدا‌ له‌ سوریا و پاشان له‌کوردستان، هه‌میشه‌ قۆڵێ به‌قۆڵی یه‌ک بوون ئه‌وه‌ نمونه‌یه‌کی بێ ئه‌مه‌کی مام جه‌لال ه‌ بۆ تێکۆشه‌رێکی وه‌ک ئیبراهیم عه‌زۆ. مام جه‌لال له‌سوریا به‌قسه‌ وابه‌نیاز بووه‌ تۆڵه‌بکاته‌وه‌ به‌ڵام له‌ره‌فتاردا به‌شیوه‌یه‌کی تر ئه‌مه‌کی خۆی نیشانداوه‌.

ڕیفۆرمه‌که‌ی ناو یه‌کێتی سه‌رناگرێت !؟
له‌پاش پێشکه‌شکردنی یاداشتنامه‌ی سێ ئه‌ندام مه‌کته‌ب سیاسییه‌که‌ له‌ ساڵی 2005 دا به‌مام جه‌لال به‌ براده‌رانی به‌مه‌کته‌بی سیاسیم گوت کورد له‌رووی سیاسییه‌وه‌ شکستی هێناوه‌ ئێوه‌ به‌هیچ جۆرێک له‌م یاداشته‌دا باسێکی نیشتیمان تان تێدا نه‌کردووه‌، که‌رکوک وشوینه‌دابراوه‌کانی تێدانه‌بووه‌ ،پاشان داخوازییه‌کان داخوازی نیشتیمانی نه‌بوون ، هه‌روه‌ها رۆڵی خه‌ڵکی ئه‌وروپاتان فه‌رامۆشکردووه‌‌ ،به‌تایبه‌ت له‌لایه‌نی که‌ چۆن ره‌وه‌ندی کوردی بخرێنه‌گه‌ر بۆ چاکسازی . وتم مام جه‌لال زۆر له‌ کادیری ئه‌وروپا ده‌ترسێت چونکه‌ ده‌ستی پێ ناگات ، ئه‌وه‌ خه‌سڵه‌تی مام جه‌لاله‌ هه‌روه‌ها مه‌سه‌له‌ی عه‌سکه‌ری تێبینی وگومانم هه‌بوو له‌سه‌ری پرسیارم لێکردن وتم ئێوه‌ له‌روی عه‌سکه‌ریوه‌ له‌گه‌ڵتانن؟ ئه‌وان گوتیان له‌ سه‌دا %85 ی له‌گه‌ڵماندایه‌ ، به‌ڵام واده‌رنه‌چوو.
پاش یاداشته‌که‌ش دانیشتمه‌وه‌له‌گه‌ڵیاندا پیم گوتن: تۆ ئه‌گه‌ر سه‌یری یه‌کێتی نیشتیمانی بکه‌یت ئه‌وه‌تی هه‌یه‌ یه‌کێتی نیشتیمانی سه‌رکردایه‌تیه‌که‌ی ناکۆکه‌ ، هۆکه‌ش‌ی مام جه‌لاله‌ !؟ چونکه‌ مام جه‌لال ده‌زانێت نابێت ئه‌وانه‌ یه‌ک بن چونکه‌ ئه‌گه‌ر یه‌ک بن ، ئیتر ئه‌ورۆڵیی نامێنێت هه‌مووی ده‌بێت پێوستییان به‌ مام جه‌لال بێت دوو دوو یه‌ک یه‌ک سێ سێ وای لێکوردون ، من کۆبونه‌وه‌م زۆر له‌گه‌ڵ مام جه‌لال دا کردووه‌ ، له‌ناوکۆبونه‌وه‌دا که‌ئه‌گه‌ر پێنج که‌س بووین له‌سه‌ره‌تادا دووانمان ده‌دات به‌شه‌ر بۆ ئه‌وه‌ی مه‌شغوڵ ببین ، یه‌کێکیتریش دێته‌ ناومانه‌وه ئیدی دوانه‌که‌ی تریش وه‌ک پۆری خوراویان لێده‌کات ‌ له‌دروستبوونی یه‌کیتی نیشتیمانی ئه‌م نه‌ریته‌ کاری پێده‌کرێت. به‌جه‌ماعه‌تی ریفۆرمم گوت :ئه‌گه‌ر ئێوه‌ به‌م شێوازه‌ کاربکه‌ن بکه‌ن یه‌ک یه‌ک به‌ته‌پڵی سه‌ردا ده‌تاندات به‌عاردابۆ ئه‌م قسه‌یه‌شم(دلێری سه‌ید مه‌جید ، عیماد ئه‌حمه‌د، عومه‌ری سه‌یدعه‌لی ، شه‌ماڵ عه‌بدوالوه‌فا) شاهێدن پێشم گوتن که‌س وه‌ک من مام جه‌لال نانسێت. مام جه‌لا ئه‌زموونی هه‌یه‌ له‌ چاره‌سه‌رکردنی ئه‌وجۆره ‌شتانه‌ ، مام جه‌لال له‌ساڵی 1955 دا شوان لای دیوه‌ که‌میل سۆنی دیوه‌ ، 1956 ، 1957 که‌ چووه‌ بۆ مۆسکۆ هه‌تا که‌ی جی بی موافه‌قه‌تی بۆکردووه‌ مام جه‌لال دووجار مه‌لا مسته‌فای دیوه‌ ، جاوه‌ره‌ ئێستا مام جه‌لا نه‌وتی هه‌یه‌ ، سه‌رۆکی ئێراقه‌ شه‌ش هه‌زار حیمایه‌ی هه‌یه‌ ، ئه‌گه‌ر تۆ سیاسییه‌ن ته‌عامل له‌گه‌ڵ مام جه‌لال نه‌که‌یت ده‌ره‌قه‌تی نایه‌یت ، مام جه‌لال هێزه‌ . ئه‌وبراده‌رانه‌ له‌م شتانه‌ تێنه‌ده‌گه‌یشتن تارۆژه‌که‌یان بوو به‌ورۆژه‌ .
له‌ئاست فه‌رامۆشکردنی نوسینه‌وه‌ی مێژووی کۆمه‌ڵه‌
به‌بروای من یه‌کێک له‌هۆکاره‌کان ئه‌وه‌بوو که‌ کۆمه‌ڵێک خه‌ڵک بوون به‌خاوه‌نی کۆمه‌ڵه‌ که‌زۆر دوور بوون له‌په‌روه‌رده‌کردنی خه‌ڵکی کۆمه‌ڵه‌ جائه‌وانه هه‌رره‌نگه‌ پێیان سه‌یر بێت مێژوویه‌ک بنوسن که‌خاوه‌نی نین ، پێشینیارم ئه‌وه‌یه‌ که‌ده‌زگایه‌ک هه‌بێت بۆ کۆکردنه‌وه‌ی ئه‌ودیکۆمێناتنه‌ ، و له‌فه‌وتان رازگاریان بێت ، به‌ڵام ئه‌و ده‌زگایه‌ نابێت یه‌کێتی بێت چونکه‌ ئه‌گه‌ر یه‌کێتی مێژووی کۆمه‌ڵه‌ بنوسێته‌وه‌ به‌سه‌قه‌تی ده‌ینوسێته‌وه‌ .
وه‌ریسی کۆمه‌ڵه‌ مام جه‌لال ه‌ !؟
مام جه‌لال وه‌ریسی کۆمه‌ڵه‌یه‌ ته‌نانه‌ت له‌سه‌رده‌می خاڵه‌شه‌هابیشدا قوتبی هه‌موو شته‌کان مام جه‌لال بووه‌ ، ئه‌مه‌ که‌س ناتوانێت لاری له‌وه‌بکات ، خاڵه‌شه‌هاب دووسێ سه‌فه‌ری کردووه‌ هاتوه‌ مام جه‌لالی بینیوه‌ ، خاڵه‌ شه‌هاب به‌چه‌ند مانگ له‌سوریا له‌لای مام جه‌لال بووه‌ ، ته‌نانه‌ت کۆمه‌ڵه‌ له‌ناوه‌وه‌ به‌بێ مام جه‌لال کاری نه‌کردووه‌ .من پێت ده‌ڵێم عه‌یبه‌که‌شمان ئه‌وبووه‌ هه‌موومان چاوه‌رێی ده‌ستی مامجه‌لال بوین. مام جه‌لال نه‌ک هه‌روه‌ریسه‌ هه‌رئه‌ویشه‌ هه‌ڵوه‌شینه‌ره‌وه‌ی کۆمه‌ڵه‌ ، بۆ زانیاریشتان کۆمه‌ڵه‌ به‌مام جه‌لال نه‌بوایه‌ به‌که‌سی تر نه‌ده‌توایه‌وه‌ ، له‌م کاره‌شدا نه‌وشیروان مسته‌فا هاوکارو هاوڕایه‌. مام جه‌لال هه‌مووشتێک لای خۆی بوو ، به‌ڵام لێره‌ شتێک هه‌یه‌ ده‌بێت باسی بکه‌م " فازیلی مه‌لا مه‌حمود" له‌سوریا به‌منی گوتووه‌ که‌ ئه‌و مام جه‌لال م کردووه‌ به‌کۆمه‌ڵه‌ ، واته‌ فازیل په‌یوه‌ندی کردووه‌ به‌مامجه‌لاله‌وه‌ من له‌مامجه‌لال م نه‌پرسیوه‌ چۆن بویت به‌کۆمه‌ڵه‌ کێ په‌یوه‌ندی پێکردوویت ، به‌ڵام با بۆ مێژوو بزوتنه‌وه‌ی سیایسی کورد بنوسرێته‌وه‌ له‌م باره‌یه‌وه‌ هه‌میشه‌ چاومان له‌ده‌ستی یه‌کێک بووه‌ ،ته‌نانه‌ت بازنه‌ی رۆشنبیر‌ی که‌باناوی کۆمه‌ڵه‌ دروستمانکردبوو هه‌موو چاوێکمان له‌وه‌بوو که‌ مامجه‌لال رابه‌رایه‌تیمان بکات .
بۆچی ئه‌وه‌نده‌ چاوه‌رێێ ده‌ستی مام جه‌لال بن !؟
به‌شێکی په‌یوه‌دنی هه‌یه‌ به‌ترسنۆکیمانه‌وه‌ ، به‌نه‌بوونی متمانه‌ وباوه‌ڕ به‌هێزه‌کانی خۆ ده‌نا ئه‌گه‌ر ترس نه‌بێت ئه‌گه‌ر باوه‌رت به‌خۆت بێت ، چ پێویست ده‌کات هێنده‌ چاوت له‌رابه‌رایه‌تیکردنی مام جه‌لال بێت .من له‌گه‌ڵ ئه‌وه‌دام عاملی زاتی ده‌وری هه‌یه‌ ، له‌دروستبوونی حیزب وده‌وڵه‌ت به‌ڵام ئێجگار به‌وشێوه‌یه‌ ته‌سلیمی بیت چاوپۆشی له‌هه‌ڵه‌ مێژوویه‌کانی بکه‌یت تاوانه‌ .

جارێکی تر کۆمه‌ڵه‌یه‌کی تر له‌ ناوکورددا دروست نابێته‌وه‌ ، مه‌گه‌ر له‌ ئه‌وروپاوه‌شتێک بکرێت !؟
برواناکه‌م به‌هیچ شێوه‌یه‌ک کۆمه‌ڵه‌ دروستبێته‌وه‌ چونکه‌ هۆکار زۆره‌ گرنگترینیان ئێستا بنه‌ماڵه‌ی بارزانی ومام جه‌لال نه‌وت ده‌رده‌هێنن ، ئه‌مرۆ رێکخراو وحیزب دروستکردن ئیمکانیاتی مادی ده‌وێت جاری جاران نییه‌ به‌برسیه‌تی حیزب دروست بکه‌یته‌وه‌ ، کاک نه‌وشیروان بۆچی به‌و هه‌موو تواناو لێهاتوییه‌ی خۆیه‌وه‌ هیچی پێ ناکرێت ، بۆ چی به‌و هه‌مووکاریزمایه‌ ده‌ربازبوون و جه‌رائه‌تی گه‌وره‌ی لێ به‌دی ناکرێت له‌به‌رئه‌وه‌ی چاوه‌رێی ده‌ستی مام جه‌لاله‌ که‌پاره‌ی بداتێ. پاشان ئێمه‌ جاران له‌کۆمه‌ڵه‌دا فێری کۆمه‌ڵێک مۆراڵ کرابووین، زه‌حمه‌ته‌ ئه‌مرۆ خه‌ڵک له‌سه‌رئه‌و مۆراڵانه‌ رابهێنیت ، ئێمه‌ جاران خواردنه‌وه‌ی مه‌شروب، قومارکردن، ته‌ماشاکردنی کچ ، تانانه‌ت ئه‌گه‌ر "چواله"‌ که‌له‌سه‌ره‌تادا ده‌رده‌چوو که‌مێک گران بووایه‌ نه‌مانده‌کڕی ده‌مانگوت چۆن ئه‌بێت کادیری کۆمه‌ڵه‌ "چواله"‌ به‌گرانی بکڕێت و خه‌ڵکی نان نییه‌ بیخوات . به‌ڵام له‌گه‌ڵ ئه‌وه‌شدا به‌بروای من یه‌ک تاکه‌رێ هه‌یه‌ ئه‌ویش ‌ئه‌وروپایه‌، که‌ سه‌کۆیه‌کی رۆشنبیری کوردی دروستببێت بۆ به‌ره‌وپێشبردنی کێشه‌ی سیاسی کورد.

په‌یامێک بۆ مێدیا
من خۆم به‌قه‌رزاری میله‌ت ئه‌زانم، ئێوه‌ رۆڵتان زۆره‌ له‌ نوسینه‌وه‌ی مێژووی رووداوه‌کان تکام وایه‌ راستییه‌کان به‌نه‌وه‌ی داهاتوو بگه‌ێنن. ئێوه‌ن به‌سه‌رهات و رووداوه‌کان ده‌که‌ن به‌دیکۆمێنت. تکام وایه‌ جه‌ختی هه‌ره‌ گه‌وره‌تان له‌سه‌ر چه‌مکی نیشتیمانی بوون بێت ، هه‌رکه‌سێکتان دواند له‌رووی ستراتیژی پاراستنی ئاسایشی نیشتیمان بیدوێنن. هه‌ستی نیشتیمانی بوون لای خه‌ڵک ئه‌مرۆ زۆر لاوازه‌ ،پارتی ویه‌کێتی وایان له‌م وڵاته‌ کرد که‌خه‌ڵکی بیه‌وێت وڵات به‌جێ بهێڵێت کوردایه‌تی له‌به‌رچاوی هاوڵاتی ره‌ش کرا. قسه‌تان له‌گه‌ڵ هه‌رکه‌سێک کرد بچنه‌ ناو کرۆکی کوردایه‌تی یه‌وه‌، من بۆت دوباره‌ده‌که‌م ئێمه‌ چ زه‌ره‌ریکمان داوه‌ ئه‌وخه‌ڵکه‌ خه‌باتگێره‌ به‌هه‌زاران که‌س لێی شه‌هید بووه‌، له‌پێناوی هیچ. بۆ خزمه‌تی کوردایه‌تیمان نه‌کرد؟ هه‌تا کورد نیشتیمانیه‌تی نه‌کات به‌سترتیژێک ناتوانێت ببێت به‌هیچ له‌ پاراستنی ئاسایشی نه‌ته‌وه‌ی ده‌وڵه‌ت دروستده‌بێت ، سه‌یری ئیسرائیکل بکه‌، بروانه‌ ئه‌مریکا، هه‌نگاوێک نانێن ئه‌گه‌ر زیانی هه‌بێت بۆ ئاسایشی نه‌ته‌وه‌ییان، ئیسرائیل هه‌ر چوارده‌وری گیراوه‌، به‌ڵام به‌ پاراستنی ئه‌منی قه‌ومی ئیسرائیل خۆی راگرتووه‌.


سازدانی گفتوگۆ و به‌دواداچوونی : کامه‌ران ئیسحاق په‌ری
ده‌زگای شرۆڤه‌ ـ نوسینگه‌ی لڤینی ـ ئه‌وروپا ـ
سه‌رنج : سه‌رجه‌م مافه‌کان بۆ گۆڤاری لڤین و ماڵپه‌ڕی شرۆڤه‌ پارێزراوون .